Янги Зеландиядаги узун думли кўршапалаклар (Chalinolobus tuberculatus) мамлакатда ноёб ва йўқолиб кетиш хавфи остида турган қушларнинг 2021 йилги танловида ғалаба қозонди. Бу ҳақда конкурс веб-сайтида эълон қилинди, деб ёзади Meduza.
Танловга бошчилик қилган Forest and Bird ҳайвонларни ҳимоя қилиш гуруҳи маълумотларига кўра, маори тилида pekapeka-tou-roa номи билан машҳур бўлган эндемик тур 70 дан ортиқ рақобатчиларидан ўзиб кетган ва 58 561 та овоз олган. «Аввалги йиллардагидан фарқли ўлароқ, сайловларда сохталаштиришга уринишлар бўлмади!» — дейилади ташкилот хабарида.
BBC News қайд этишича, ижтимоий тармоқлар фойдаланувчилари натижаларни сарҳисоб қилгач, ташкилотчиларни танқид қилиб, овоз беришни «қип-қизил томоша» ва «ўғирланган сайловлар» деб атади. Баъзи танқидчилар овоз бериш натижасини коронавирус пандемияси туфайли «нурсизланган» кўршапалаклар қиёфасини тиклашга уриниш билан боғлади, аммо Forest and Bird буни рад этмоқда.
Forest and Bird 16 йиллик сайловларда биринчи марта қуруқликдаги сутемизувчиларни овоз бериш рўйхатига киритди ва уларни қушлар билан бир хил қийинчиликларга дуч келаётганини таъкидлади.
Янги Зеландияда «Йил қуши» танлови кўпинча баҳс-мунозараларга сабаб бўлади. 2019 йилда танлов ташкилотчилари Россиядан юзлаб овозлар олган, бу эса натижаларни сохталаштириш ҳақидаги хавотирларни келтириб чиқарган. Бироқ овозлар хакерлар эмас, россиялик қуш кузатувчилари томонидан берилгани маълум бўлди.
Изоҳ (0)