Ўзбекистонда октябрь ойида инфляция даражаси 1,3 фоизни ташкил этди. Бу ҳақда Давлат статистика қўмитасининг Истеъмол секторидаги инфляция даражасига оид ҳисоботида маълум қилинди.
2021 йил бошидан буён истеъмол секторидаги нархларнинг ўсиш даражаси 7,3 фоизни, йиллик нисбатда эса 10,6 фоизни ташкил этган. Таққослаш учун, 2020 йилнинг январь—октябрь ойлари давомида истеъмол нархлари индекси 7,8 фоизга, 2019 йилнинг мос даврида эса 11,4 фоизга ўсган.
Маълум қилинишича, сентябрь ойида озиқ-овқат маҳсулотлари 1,9 фоизга қимматлашган. Ўтган йилнинг мос даврида эса ушбу кўрсаткич 2,3 фоизни ташкил этган. Шунингдек, ўтган йилгига нисбатан ноозиқ-овқат маҳсулотлар нархининг ўсиши тезлашган — 1,1 фоиз (0,8 фоиз эди). Хизматлар нархи 0,5 фоизни ташкил этди (0,7 фоиз эди).
Spot’нинг ёзишича, ёзги дефляциядан сўнг нархлар ўсиши секин-аста тезлашган — августда инфляция кўрсаткичи 0,5 фоизни, сентябрда эса 1,1 фоизни ташкил этганди. Бироқ ҳозирча Марказий банкнинг 2021 йил бўйича 10 фоизли даражасидаги прогнозлари ўзини оқламоқда.
10 фоиз — 2017 йилдан буён қайд этилган энг паст кўрсаткич. 2019 йил якунлари бўйича инфляция 15,2 фоизни, 2018 йилда 14,3 фоизни, 2017 йилда 14,4 фоизни ташкил этган. Бунга қадар ўнлаб йиллар давомида Ўзбекистонда инфляция даражаси 3-5 фоизни ташкил этган, бироқ ушбу рақамлар шубҳали.
Изоҳ (0)