Президент фармони билан Ўзбекистоннинг Тожикистондаги фавқулодда ва мухтор элчиси Эргаш Шоисматов «Дўстлик» ордени билан мукофотланди. Бу ҳақда Президент матбуот котиби Шерзод Асадов маълум қилди.
Фармонда Эргаш Шоисматовнинг давлат бошқаруви органларидаги кўп йиллик самарали меҳнати, Ўзбекистон ва Тожикистон ўртасидаги стратегик шерикликни ҳар томонлама чуқурлаштириш, кўп қиррали ва узоқ муддатли ҳамкорлик алоқаларини янги босқичга кўтариш йўлидаги сермаҳсул фаолияти, ўзбек ва тожик халқлари ўртасидаги дўстлик ва ҳамжиҳатлик ришталарини янада мустаҳкамлашга қўшаётган салмоқли ҳиссаси қайд этилган.
Маълумот учун, Эргаш Шоисматов 1951 йилда туғилган. Тошкент политехника институтини тамомлаган. 1996 йилдан 2001 йилгача Ўзбекистон энергетика ва электрлаштириш вазири лавозимида ишлаган. 2001—2006 йилларда «Ўзбекэнерго» компаниясини бошқарган.
2006 йил апрелидан 2010 йил 13 июлига қадар бош вазирнинг машинасозлик, металлургия, нефть-газ, геология, электр энергетикаси ва кимё йўналишларига масъул ўринбосари лавозимида фаолият юритган. 2014 йилда энергетика ишчилари касаба уюшмаси республика кенгаши раиси бўлган. Эргаш Шоисматов 2016—2017 йилларда «Ўзтрансгаз» АК бошқаруви раиси сифатида фаолият олиб борганди. 2018 йилдан буён Ўзбекистоннинг Тожикистондаги элчиси лавозимида ишлаб келмоқда.
Эслатиб ўтамиз, июль ойида Шавкат Мирзиёев Европа тикланиш ва тараққиёт банкининг собиқ президентини, август ойида эса Москва давлат халқаро муносабатлар институти ректорини «Дўстлик» ордени билан мукофотлаганди.
Изоҳ (0)