Афғонистонда ҳокимиятни қўлга олган «Толибон» ҳаракати ўз делегацияларининг яқинда Ўзбекистон, Россия ва Қатарга қилган ташрифи натижаларини ижобий баҳолади. Бу ҳақда 30 октябрь куни «Толибон» вакили Забиҳуллоҳ Мужоҳидга таяниб, «ТАСС» хабар берди.
«Биз Афғонистон Ислом Амирлиги делегацияларининг Москва, Қатар ва Ўзбекистонга ташрифини жуда яхши баҳолаймиз. Бу ташрифлар ижобий натижа берди», — деб таъкидлаган «Толибон» вакили Кобулда ўтказилган матбуот анжуманида ва Ўзбекистонда чегара хавфсизлиги, транзит, божхонада ҳамкорлик масалалари муҳокама қилинганини қайд этиб ўтган.
Эслатиб ўтамиз, 16 октябрь куни Афғонистон муваққат ҳукумати раҳбарининг ўринбосари вазифасини бажарувчи Абдулла Салам Ҳанафий бошчилигидаги делегация Термизга ташриф буюриб, Ўзбекистон ҳукумати вакиллари билан музокара ўтказган эди.
Музокаралар чоғида турли вазирлик ва идоралар вакиллари чегара хавфсизлиги, инвестициялар, ўзаро савдо, энергетика, халқаро юк ташиш ҳамда транзит соҳаларидаги ҳамкорлик масалалари муҳокама қилинди. Шунингдек, таълим ва гуманитар соҳалардаги алоқаларни ривожлантириш борасида ҳам фикр алмашилди.
Инфратузилмавий лойиҳаларини амалга ошириш, хусусан, Сурхон—Пули-Хумри электр узатиш линиясини ўтказиш ҳамда Термиз—Мозори-Шариф — Кобул—Пешавор темир йўлини қуришга алоҳида эътибор қаратилди.
Томонлар муносабатларнинг кўриб чиқилган ҳар бир йўналишида ўзаро ҳамкорлик қилиш йўлларини муҳокама қилди ҳамда устувор соҳаларда мавжуд масалаларни ҳал этиш бўйича биринчи даражали вазифаларни белгилаб олди.
Музокаралар якунлари бўйича Ўзбекистон ва Афғонистон «бир неча соҳаларда ишчи гуруҳлар тузди». Томонлар 10 кун ичида икки томонлама муносабатларни ривожлантириш бўйича «йўл харитаси»ни тайёрлайди ва уни икки мамлакат раҳбарларига тақдим этади.
Изоҳ (0)