ДХХнинг Қашқадарё вилояти бўйича бошқармаси ҳамда вилоят ички ишлар бошқармаси ходимлари томонидан Деҳқонобод туманида ўтказилган тезкор тадбирда «Жиҳодчилар» диний экстремистик оқими тарафдорларидан иборат ноқонуний гуруҳ фаолиятига чек қўйилди, деб хабар бермоқда ЎзА.
Аниқланишича, ўзаро йиғинлар вақтида улар «Жиҳодчилар» оқими ғоялари йўғрилган аудио-видео кўринишдаги материалларни тинглаб, томоша қилган ҳамда ҳижрат ва жиҳод қилишга хайрихоҳлик билдирган.
Гуруҳнинг 1969–1995 йиллар оралиғида туғилган 12 нафар аъзоси орасида маҳалла фуқаролар йиғини раиси, ўрта мактаб ўқитувчиси, масжид имом-ноиби, якка тартибдаги тадбиркор ҳамда мавсумий ишчилар бор.
Гуруҳ аъзоларининг яшаш манзиллари кўздан кечирилганда хотирасида диний мазмундаги аудио-видео материаллар мавжуд бўлган уяли алоқа воситалари ва флешкарталар, шунингдек, нашриёти кўрсатилмаган китоблар борлиги аниқланиб, экспертизадан ўтказиш учун расмийлаштириб олинган.
Ҳозирда мазкур шахсларга нисбатан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, бундан аввал Сурхондарё ва Жиззахда «Жиҳодчилар»нинг 15 ва 23 кишидан иборат иккита гуруҳи аъзолари, Қўқонда 9 кишидан иборат «Жиҳодчилар» гуруҳи, Тошкент вилоятида «Жиҳодчилар» экстремистик оқими аъзоларининг 10 нафари қўлга олинганди.
Мавзуга доир: ИШИД аъзоси ДХХ томонидан Ўзбекистонга олиб келинди
Изоҳ (0)