Япония ҳукумати Ўзбекистонга фавқулодда вазиятларга тайёргарлик шароитида болаларни ҳимоя қилиш тизимини мустаҳкамлаш учун 200 минг долларлик грант ажратди. Бу ҳақда «Gazeta.uz»га ЮНИСЕФ матбуот хизмати маълум қилди.
Япония Афғонистон ва унга қўшни давлатлар — Ўзбекистон, Покистон, Эрон, Тожикистонга гуманитар эҳтиёжлар ортиб бораётгани муносабати билан жами 65 миллион доллар миқдоридаги фавқулодда грант ёрдами ажратган. Ёрдам еттита халқаро ташкилот орқали амалга оширилади.
Мазкур грант доирасида ЮНИСЕФ Ўзбекистон Маҳалла ва оилани қўллаб-қувватлаш вазирлиги ҳамда Халқ таълими вазирлиги билан ҳамкорликда Республика «Ташхис» маркази ёрдамида фавқулодда вазиятларда болаларни ҳимоя қилиш миллий тизимини мустаҳкамлашга 200 минг доллар йўналтиради.
Асосий тадбирлар Сурхондарё вилоятидаги болаларни ҳимоя қилиш бўйича ишларда қўлланма сифатида хизмат қилувчи ва уларни тегишли мутахассисларга йўналтирувчи идоралараро стандарт операцион тартиб-қоидаларни ишлаб чиқишни ўз ичига олади.
Ижтимоий соҳа ходимлари Маҳалла ва оилани қўллаб-қувватлаш вазирлиги ҳузурида ўқув платформасини яратиш ҳамда мустақил онлайн ўқув курсларини ривожлантириш орқали ўз билим ва кўникмаларини оширади. Шунингдек, Халқ таълими вазирлиги ҳузуридаги иккита психологик-ижтимоий кўмак маркази зарур мебель ва IT-ускуналар билан жиҳозланади.
Лойиҳа Ўзбекистондаги 70 минг дан ортиқ бола ва уларнинг оилалари фаровонлигини яхшилашга ёрдам бериши кутилмоқда.
«Ҳар қайси инқирозли вазиятда энг катта жабрни болалар кўради. Можаролар, табиий офатлар ва бошқа фавқулодда ҳолатлар қизлар ва ўғил болаларга нисбатан зўравонлик, эксплуатация, шавқатсиз муносабат ва эътиборсизлик хавфини оширади. Аксарият ҳолларда, болалар асосий шароитлардан маҳрум бўлади ҳамда бу уларнинг руҳий ва психологик фаровонлигига салбий таъсир кўрсатади», — дейди ЮНИСЕФнинг Ўзбекистондаги ваколатхонаси раҳбари Мунир Мамедзаде.
«Шунинг учун ҳам бу инвестициялар болаларни ҳимоя қилиш тизимларини мустаҳкамлашга, хусусан, зўравонлик ва мажбурий меҳнат ҳолатларининг олдини олиш ва уларга жавоб бериш, оилалардан ажралиш, руҳий саломатлик ва психологик-ижтимоий қўллаб-қувватлаш бўйича ижтимоий ходимларнинг малакаларини оширишга қаратилиши муҳимдир», — дея қўшимча қилган ваколатхона раҳбари.
Мавзуга доир:
Изоҳ (0)