Марказий сайлов комиссияси 29 октябрь куни бўлиб ўтган йиғилишида Шавкат Мирзиёевни кейинги беш йилга Ўзбекистон Президенти лавозимига сайланган деб ҳисоблаш тўғрисида қарор қабул қилди. Бу ҳақда МСК матбуот хизмати «Дарё»га маълум қилди.
24 октябрь куни ўтказилган сайлов натижаларига кўра, мамлакатдаги 20 158 907 нафар сайловчининг 16 212 343 нафари, яъни 80,4 фоизи сайловда иштирок этган. Фойдаланилмаган ва бузиб қўйилиб, бекор қилинган сайлов бюллетенларининг умумий сони 4 047 358 тани ташкил этган.
Овоз беришда иштирок этган сайловчилар томонидан ҳар бир номзодни ёқлаб берилган овозлар сони қуйидагича:
- «Адолат» социал-демократик партиясидан номзод Баҳром Абдуҳалимовга – 549 минг 766 нафар ёки овоз беришда иштирок этган сайловчиларнинг 3,39 фоизи;
- Тадбиркорлар ва ишбилармонлар ҳаракати – Ўзбекистон Либерал-демократик партиясидан номзод Шавкат Мирзиёевга – 12 миллион 988 минг 964 нафар ёки овоз беришда иштирок этган сайловчиларнинг 80,12 фоизи;
- Экологик партиядан номзод Нарзулло Обломурадовга – 670 минг 641 нафар ёки овоз беришда иштирок этган сайловчиларнинг 4,14 фоизи;
- «Миллий тикланиш» демократик партиясидан номзод Алишер Қодировга – 888 минг 515 нафар ёки овоз беришда иштирок этган сайловчиларнинг 5,48 фоизи;
- Халқ демократик партиясидан номзод Мақсуда Ворисовага – 1 миллион 75 минг 16 нафар ёки овоз беришда иштирок этган сайловчиларнинг 6,63 фоизи ёқлаб овоз берган.
Сайлов кодексига кўра, Ўзбекистон Президенти Марказий сайлов комиссияси томонидан Президент сайлови натижалари расмий равишда эълон қилинган кундан эътиборан кечи билан икки ой ичида Олий Мажлис палаталарининг қўшма мажлисида қасамёд қилган пайтдан эътиборан ўз лавозимига киришади.
Эслатиб ўтамиз, 25 октябрь куни Марказий сайлов комиссияси президент сайловларининг дастлабки натижаларини эълон қилишдан аввал Россия президенти Владимир Путин, Беларусь президенти Александр Лукашенко ва Қозоғистон президенти Қосим-Жўмарт Тўқаев Шавкат Мирзиёевни президентлик сайловидаги «ишончли ғалабаси» билан табриклаган эди.
Изоҳ (0)