Хитой ҳукумати кичик шаҳарларга жуда баланд осмонўпар бинолар қуришни тақиқлади. BBC News хабарига кўра, бундай қарор мамлакат расмийларининг ҳаддан ташқари қиммат қурилиш лойиҳаларига қарши кураши билан боғлиқ.
Хитойнинг Уй-жой вазирлиги ва Фавқулодда вазиятлар вазирлиги қўшма баёнотида аниқлик киритишича, чекловлар аҳолиси 3 миллион кишидан кам бўлган шаҳарларга тааллуқлидир. У ерда баландлиги 150 метрдан ортиқ бўлган бинони қуриш учун қурилиш раҳбари махсус рухсатнома олиши керак, баландлиги 250 метрдан юқори бўлган иншоотлар қуриш эса бутунлай тақиқланади.
Шу пайтгача Хитойда 500 метрдан баланд биноларни қуриш тақиқланган эди. Айни пайтда Шанхайда 632 метрлик минора, Шэньчжэнда эса 599 метрлик молиявий марказ мавжуд.
Янги тақиқ ҳақида эълон қилар экан, Хитой оммавий ахборот воситаларининг изоҳлашича, Шанхай каби йирик ва аҳоли зич жойлашган шаҳарлар осмонўпар биноларга муҳтож бўлиши мумкин. Ер майдони етарли бўлган кўпгина шаҳарларнинг эса бундай биноларга эҳтиёжи йўқ, аксинча улар фақат беҳудага қурилмоқда.
2021 йил бошида Хитой «хунук архитектура»ни тақиқлаган эди.
Изоҳ (0)