Санитария-эпидемиологик осойишталик ва жамоат саломатлиги хизмати бошлиғининг ўринбосари, тиббиёт фанлари доктори, профессор Нурмат Отабеков Ҳиндистонда коронавируснинг янги штамми пайдо бўлгани тўғрисида тарқалгани хабарлар юзасидан маълумот берди, деб ёзади ССВ матбуот хизмати.
Унинг сўзларига кўра, COVID-19 нинг қўзғатувчиси бўлган SARS-CoV-2 вируси вақт ўтиши билан янгиланиб, атроф-муҳитга мослашиб бормоқда. Унинг янги штаммлари SARS-CoV-2 нинг мутацияга учраши оқибатида пайдо бўлади. Яъни вирус ўзини сақлаб қолиш учун қайта-қайта янгиланишга уринмоқда.
Таъкидланишича, табиатда учрайдиган барча вируслар ўзгарувчанликка мойил. Баъзи тадқиқотчилар SARS-CoV-2 нинг 5000 тадан 7000 тагача бўлган мутацияга учраган шакли борлигини даъво қилади. Шу пайтгача одам организмига мослашишга уриниш натижасида коронавируснинг баъзи бир штаммлари пайдо бўлганини дунё олимларининг фикрлари исботлаб турибди. Вирус штаммларининг ўзига хослигига қараб «альфа», «бетта», «гамма», «йота», «лямбда», «дельта», «дельта плюс» каби штаммлари алоҳида ажратилган.
«Биз вирусларнинг у ёки бу тури аниқланган жойга қараб ҳам ном бериб келяпмиз. Масалан, ‘британча’ штамм деб номлаганимиз, аслида ‘альфа’ штамми, ‘африканча’ деб атаганимиз ‘бетта’ штаммидир. ‘Дельта’ штамми Ҳиндистонда аниқланган бўлиб, ҳозир сўз юритаётганимиз AY.4.2 штамми ҳам Ҳиндистонда аниқлангани таъкидланмоқда. ЖССТ ҳам коронавируснинг кўплаб штаммлари орасидан юқоридагиларни анчайин хавфли, деб эътироф этиб, уларга эътиборли бўлиш шартлигини таъкидлаб келмоқда.
Унутмаслик керакки, дунёда пайдо бўлган вирусларнинг яшаш учун кураши табиий жараён. Орамизда ‘менга вирус юқмайди’, ‘мен ўтган йили касалланганман’, ‘энди касал бўлмайман’, деб юрганлар янги, кучли, одам организмига мослашган штаммларга йўлиқиши эҳтимоли бор», — дейди Отабеков.
Нурмат Отабековнинг таъкидлашича, дунё олимлари томонидан яратилаётган вакциналар вирус штаммларининг асосида турган SARS-CoV-2 га қарши ишлайди. Вирус мутацияга учраган тақдирда ҳам, вакцинанинг ҳимояловчи хусусияти сақланиб қолади.
«Коронавируснинг қайси штаммига қарши курашишдан қатъи назар, оммавий иммунитет шакллантирилса, касалликни енгиб ўтиш мумкин. Биз хасталик қўзғатувчисини биламиз. Унинг профилактикасидан хабардормиз. Энг асосийси, бизда вирусга қарши асосий қурол бўлган вакциналарнинг бир неча турлари захираси шакллантирилган. Шундай экан, аҳолимиздан бирдамлик билан вакцинация жараёнларига эътиборли бўлишни сўраб қоламиз», — дея қайд этади Отабеков.
Эслатиб ўтамиз, 2021 йил 30 январь куни коронавируснинг «британча» штамми Ўзбекистонга кириб келгани маълум бўлганди. У 23 январь куни Дубайдан қайтиб келган 10 ёшли қизчада аниқланган. ССВ эса коронавируснинг янги штамми аниқланган қизча ҳақида нима учун 1 ҳафтадан кейин эълон қилинганига изоҳ берганди. 17 апрель куни бош вазир Абдулла Арипов бошчилигида коронавирусга қарши кураш комиссиясининг кенгайтирилган йиғилишида Ўзбекистонга коронавируснинг «африкача» штамми кириб келгани айтилганди. Июнь охирларига келиб эса мамлакатда коронавируснинг «ҳиндча» штамми аниқлангани маълум қилинди.
Изоҳ (0)