Davlat kadastrlari palatasining Toshkent viloyati boshqarmasi viloyatning Zangiota tumanidan Toshkent shahrining Sergeli tumaniga o‘tkazilgan ijtimoiy obyektlar to‘g‘risida ma’lumot berdi.
Ma’lum qilinishicha, Oliy Majlis Qonunchilik palatasining 2021-yil 16-avgustdagi 1290-IV-son va Senatning 27-avgustdagi SQ-379-IV-son qarorlari ijrosi yuzasidan Kadastr agentligi hamda Davlat kadastrlari palatasining Toshkent viloyati boshqarmalari hamda hududiy bo‘linmalari tomonidan bir qator ishlar amalga oshirilmoqda. Xususan, Toshkent viloyatining Zangiota tumanidan Toshkent shahrining Sergeli tumaniga quyidagi ijtimoiy obyektlar o‘tkazilishi ta’minlangan:
- mahallalar – 13 ta;
- ko‘p qavatli turar joylar – 23 ta;
- ko‘p qavatli turar joylardagi xonadonlar – 335 ta;
- yakka tartibdagi uy-joylar – 10 954 ta;
- noturar joylar – 535 ta;
- maktablar – 7 ta;
- maktabgacha ta’lim muassasalari – 5 ta;
- diniy muassasalar – 2 ta;
- qabristonlar – 4 ta;
- madaniyat markazlari – 1 ta;
- tibbiy muassasalar – 2 ta.
Eslatib o‘tamiz, 2020-yilning 5-avgust kuni Shavkat Mirziyoyev Toshkent shahri va Toshkent viloyatining o‘zaro chegaradosh bo‘lgan tumanlari hududlarini o‘zgartirish bo‘yicha tayyorlangan loyihalar taqdimoti bilan tanishgandi. O‘shanda aholiga qulaylik yaratish maqsadida shahardan Toshkent viloyatiga 1010 gektar, viloyatdan poytaxtga 10 196 gektar yer maydoni o‘tkazilishi rejalashtirilgan edi. Keyinroq Ulug‘bek shaharchasining aholisi Toshkent viloyati tarkibiga, shuningdek, Uchtepa tumani yashovchilari uchta mahalla Toshkent viloyatining Zangiota tumani tarkibiga o‘tkazishga qarshi chiqqandi.
2021-yil iyul oxirlarida Xalq deputatlari Toshkent shahar kengashi qarori bilan poytaxtning Sergeli, Bektemir va Mirzo Ulug‘bek tumanlari hududi Toshkent viloyatining Zangiota, Qibray, Yuqori Chirchiq va O‘rta Chirchiq tumanlari hisobiga 7,8 ming gektardan ko‘proqqa kengaytirilgani ma’lum bo‘ldi.
Izoh (0)