2021—2022 йиллар куз—қиш мавсумига тайёргарлик кўриш мақсадида олиб бориладиган таъмирлаш ишлари сабаб Тошкентнинг қатор туманларида газ таъминоти вақтинча узилади. Бу ҳақда «Ҳудудгаз пойтахт» хабар берди.
Хусусан, «Янгиҳаёттумангаз» таъминоти бўлими томонидан Оққўрғон кўчасида жойлашган ўрта босим Д-76 миллиметр ерусти газ қувурини ҳаракатдаги газ қувурига улаш ишлари режалаштирилган. Шу сабабли, 28 октябрь куни соат 11:00 дан 17:00 га қадар Оққўрғон, Ойдин, Исмоилова кўчаларидаги хонадонларда ҳамда улгуржи истеъмолчиларида табиий газ таъминоти вақтинча тўхтатилади.
Шунингдек, Сергели тумани «Хонабод» маҳалласида янги қурилган оилавий поликлиникани газлаштириш учун Д-57 миллиметр янги газ қувурини мавжуд Д-100 миллиметр ўрта босим газ қувурига уланади. Шу муносабат билан 27 октябрь куни соат 11:00 дан 18:00 гача ушбу манзилдаги 17 та кўп қаватли уйдаги 1337 та хонадон ҳамда бешта улгуржи истеъмолчиларида табиий газ таъминоти вақтинча тўхтатилади.
Миробод тумани Парвона 1-тор кўчасидаги ерусти Д-76 миллиметр паст босим газ қувурини ҳаракатдаги газ қувурига улаш ишлари амалга оширилиши сабаб 27 октябрь куни соат 10:00 дан 18:00 га қадар ушбу манзилдаги 16 та хонадон ҳамда иккита улгуржи истеъмолчиларида табиий газ таъминоти вақтинча тўхтатилади.
Бундан ташқари, «Чилонзортумангаз» таъминоти бўлими томонидан Фарҳод кўчасида жойлашган ўрта босим Д-76 миллиметр ерости газ қувурини ҳаракатдаги газ қувурига улаш ишлари режалаштирилган. Шу сабабли 27 октябрь куни соат 11:00 дан 15:00 гача Бердақ, Афсона, Каттақозиробод кўчаларида ҳамда 12 та улгуржи истеъмолчиларида табиий газ таъминоти вақтинча тўхтатилади.
Янгиҳаёт тумани «Олчазор» маҳалласи ҳудудида жойлашган кам қувватли ўрта босим газ тақсимлаш пункти ўрнига кўп қувватли РДБК - 1/25 русумли ГТП ўрнатиш ишлари амалга оширилиши сабаб 27 октябрь куни соат 11:00 дан 18:00 га қадар Олмазор 146-кўчадаги 105 та ерли хонадонларда табиий газ таъминоти вақтинча тўхтатилади.
Таъкидланишича, таъмирлаш ишлари тугатилгандан сўнг, табиий газ таъминоти қайта тикланади.
«Ҳудудгаз пойтахт» газ таъминоти филиали таъмирлаш ишлари туфайли вақтинча узилишлар сабаб етказилаётган ноқулайликлар учун аҳоли ва газ истеъмолчиларидан узр сўраган.
Аввалроқ Ўзбекистонда октябрь ойида деярли 4 миллиард сўмлик газдан ноқонуний фойдаланилгани, мамлакат аҳолисининг табиий газдан қарздорлиги 500 миллиард сўмдан ошгани, Ўзбекистонда 2021 йил бошидан буён қарийб 78 миллиард сўмлик газ ўғирлангани тўғрисида хабар берилганди.
Изоҳ (0)