Қашқадарё вилоятининг Чироқчи туманида банк ходимлари 119 нафар фуқаро номига расмийлаштирилган салкам 1 миллиард сўмлик кредит маблағларини ўзлаштирган. Бу ҳақда вилоят прокурори Эркабой Тожиев коррупцияга қарши ўтказилган мажлисда айтиб ўтди, дея хабар берди «Дарё» мухбири.
Таъкидланишича, «Қишлоққурилишбанк»нинг Кўкдала филиали мансабдор шахслари Чироқчи туманининг Кўкдала қишлоғида яшовчи 119 нафар фуқаро номига расмийлаштирилган салкам 1 миллиард сўм кредит маблағини ўзлаштириб юборган.
Вилоят прокурорининг маълумот беришича, 2020—2021 йилларда вилоятда 49 нафар банк ходимига нисбатан 31 та жиноят иши қўзғатилган.
« ‘Микрокредитбанк’нинг Чироқчи филиали собиқ бошқарувчиси Файзиев тадбиркорга ажратилган 786 миллион сўм кредит маблағи қайратилмаган бўлса-да, кредит таъминоти учун гаровга олинган кўчмас мулкни гаровдан чиқариб, кредитни ўзлаштирган», — дейди вилоят прокурори Эркабой Тожиев.
Эркабой Тожиевнинг қўшимча маълумот беришича, вилоятда соғлиқни сақлаш тизимида ҳам коррупция илдиз отган бўлиб, 2020—2021 йилларда 27 та жиноят иши бўйича 28 нафар соғлиқни сақлаш тизими мансабдори жавобгарликка тортилган.
Бундан аввал Қашқадарёда икки йилда мансабдорларнинг 274 нафари маъмурий, 217 нафари эса жиноий жавобгарликка тортилгани, Ўзбекистонда 190 та норматив-ҳуқуқий ҳужжат коррупцияга қарши экспертизадан ўтказилиши ҳамда «Нархоз»нинг собиқ проректори 2 млн долларни талон-торож қилганликда гумонланиб, қидирувга берилгани ҳақида хабар берилганди.
Изоҳ (0)