Ўзбекистон ташқи ишлар вазири Абдулазиз Комилов 27 октябрь куни Афғонистон билан қўшни давлатлар ташқи ишлар идоралари раҳбарларининг Теҳрон шаҳрида бўлиб ўтган навбатдаги учрашувида иштирок этди, деб хабар берди ТИВ матбуот хизмати.
Ташқи ишлар вазири ўз нутқида бугун Афғонистонда мутлақо янги воқелик юзага келгани: тўлиқ ваколатли ҳамда халқаро эътирофга эга бўлишга интилаётган муваққат ҳукумат тузилганини таъкидлади.
Унинг қайд этишича, Афғонистон яқин келажакда минтақа давлатлари, биринчи навбатда, қўшни мамлакатларнинг миллий манфаатларига бевосита дахлдор минтақавий хавфсизликнинг муҳим омили бўлиб қолади. Айниқса, ҳозирги замонавий босқичда ушбу давлатнинг халқаро миқёсда яккаланиб қолишига йўл қўймаслик учун Афғонистонга нисбатан можародан кейинги стратегияни ишлаб чиқиш зарур.
Форум иштирокчилари Афғонистон иқтисодиётини тиклаш, биродар афғон халқига тезкор инсонпарварлик ва бошқа ёрдам кўрсатиш масаласида халқаро ҳамжамият саъй-ҳаракатларини бирлаштириш муҳим аҳамият касб этишини билдирди.
Абдулазиз Комилов 8 сентябрь куни Афғонистон масаласи бўйича 20 дан ортиқ ТИВ раҳбарлари иштирокида бўлиб ўтган учрашувда ҳам Афғонистон учун можаролардан кейинги стратегияни ишлаб чиқиш, жумладан, унинг иқтисодиётини тиклаш, мамлакатни минтақавий интеграцион жараёнларга жалб қилиш, инфратузилма лойиҳаларини амалга ошириш зарурлигига эътибор қаратганди.
Аввалроқ Ўзбекистон ТИВ раҳбари Теҳрон саммити доирасида Эрон президенти Иброҳим Раисий билан Афғонистондаги вазиятни муҳокама қилгани ҳақида хабар берилган эди. Эрон президенти афғон халқи тинчлик ва хавфсизликни ҳис қилишига ёрдам бериш кераклигини айтган. Абдулазиз Комилов Ўзбекистон Эроннинг Афғонистондаги вазиятни ўрганиш бўйича ташаббусини олқишлашини таъкидлаган.
Изоҳ (0)