Андижон шаҳрида 168 ўринли, барча стандартларга тўлиқ жавоб берадиган Президент мактаби фойдаланишга топширилди, дея хабар бермоқда «Дарё» мухбири.
Таъкидланишича, ушбу мактаб ўқувчиси бўлиш мақсадида 10 мингга яқин 5-9 синф ўқувчилари ҳужжат топширган бўлиб, ўтказилган мантиқий фикрлаш тестлари, ёзма имтиҳон ва суҳбатлар натижаларига кўра, 144 нафари ўқишга қабул қилинган. Таълим жараёни ривожланган давлатлар тажрибаси асосида ишлаб чиқилган ўқув режалари ва дастурлари бўйича инглиз тилида олиб борилади. Бунинг учун энг малакали ўқитувчилар, жумладан, 10 нафар чет эллик мутахассис жалб қилинган. Шунингдек, 15 ўринли ўқитувчилар меҳмонхонаси қурилган
Қайд этиш лозим, Президент мактабларининг асосий мақсади таълим жараёнига илғор технологияларни қўллаш орқали иқтидорли ёшларни тарбиялаш ва ўқитиш, рағбатлантириш ҳамда келгусида уларни салоҳиятини қўллаб-қувватлаш, шунингдек, ўқувчиларни касб-ҳунарга йўналтириш, етакчилик кўникмалари ва нотиқлик маҳоратини ривожлантириш, танқидий фикрлаш, ахборотни излаш, таҳлил қилиш ва қайта ишлаш, олинган билимларни амалиётда қўллаш каби кўникмаларни шакллантиришдан иборат.
Ўқув жараёни хорижий таълим муассасалари билан ҳамкорликда ишлаб чиқилган ўқув режалари ва дастурлари бўйича инглиз тилида амалга оширилади ва «STEAM – таълим» (Science — табиий фанлар, Technology – технология, Engineering – техник ижодкорлик, Аrt – санъат, Mathematics – математика) дастури асосида олиб борилади.
Мактабнинг 9–11-синфларида таълим олиш ўқувчиларнинг қизиқишлари ва хусусиятларини, айрим фанни танлаш ва уларни ўрганиш даражасини инобатга олган ҳолда индивидуал ўқув жараёни асосида амалга оширилади. Дарслар хорижнинг нуфузли университетлари билан ҳамкорликда ишлаб чиқилган ўқув режалар ва дастурлар бўйича инглиз тилида амалга оширилади.
Мактаб битирувчилари белгиланган тартибда давлат томонидан тасдиқланган шаҳодатнома, аттестат билан бир қаторда, халқаро даражадаги тегишли дастур дипломига эга бўлади. Бу эса ўз навбатида хорижий олий ўқув юртларига кириш имконини беради.
Изоҳ (0)