Қашқадарёда Nexia ва Captiva тўқнашуви оқибатида икки ҳайдовчи вафот этди

Қашқадарё вилояти содир бўлган йўл-транспорт ҳодисаси оқибатида икки нафар ҳайдовчи ҳалок бўлди. Бу ҳақда «Севимли» телеканалининг «Замон» информацион дастурида маълум қилинди.

Маълум қилинишича, 14 октябрь куни Қарши тумани ҳудудидан ўтувчи 4Р-89 Қарши—Нишон—Таллимаржон ИЭС автомобиль йўлининг 4-километрида, яъни тумандаги «Мустақиллик» МФЙ ҳудудида Nexia ва Captiva иштирокида йўл-транспорт ҳодисаси содир бўлган.

ЙТҲ Nexia-3 автомобили ҳайдовчиси аҳоли яшайдиган ҳудудда ҳаракатланаётганига қарамай, олдидаги машинани қувиб ўтмоқчи бўлганида қарама-қарши йўналишда ҳаракатланиб келаётган Captiva билан тўқнашиб кетиши натижасида юзага келган. Авария оқибатида иккала автомобилнинг ҳайдовчилари ҳам воқеа жойида ҳалок бўлган.

Ҳозирда ҳолат юзасидан Қарши туман ИИБ Тергов бўлими томонидан дастлабки тергов ҳаракатлари олиб борилмоқда.

Аввалроқ Қашқадарёда Gentra ва Nexia тўқнашуви оқибатида икки вояга етмаган қиз вафот этгани, Қашқадарёда Damas ва ЙПХ автомобили тўқнашгани, Қаршида содир бўлган ЙТҲда 24 ёшли ИИБ ходими ҳалок бўлгани, Қашқадарёда пиёда ўлимига сабабчи бўлган Nexia ҳайдовчиси воқеа жойидан яширингани тўғрисида хабар берилганди.