Qashqadaryo viloyatining Qarshi tumanida sodir bo‘lgan YTHda 24 yoshli IIB xodimi vafot etdi. Bu haqda tuman hokimligi axborot xizmati rahbari To‘lqin Turdiyev ma’lum qildi.

Foto: YHXBB

Qayd etilishicha, Qarshi tuman IIB HPB Tahlil va muvofiqlashtirish guruhi katta inspektori, katta leytenant Dilshod Tirkashev Avaz o‘g‘li kecha, 1-oktabr kuni sodir bo‘lgan YTHda olgan tan jarohati sabab vafot etgan.

“Qarshi tumani IIB va keng jamoatchilik marhumning oila a’zolariga hamda qarindosh-birodarlariga chuqur ta’ziya bildiradi”, — deyiladi Qarshi tuman hokimi matbuot kotibi To‘lqin Turdiyevning shaxsiy Telegram kanalida.

O‘zbekiston Respublikasi Ichki ishlar vazirligi Yo‘l harakati xavfsizligi Bosh boshqarmasi axborot xizmatining ma’lumot berishicha, mazkur YTH 2021-yilning 1-oktabr kuni soat 09:40 da sodir bo‘lgan.

“Qarshi tumani hududidan o‘tgan 4R-90 Qarshi—Beshkent—Kasbi—Pomuq avtomobil yo‘lining o‘ninchi kilometrida haydovchilik guvohnomasiga ega bo‘lmagan 2003-yilda tug‘ilgan fuqaro D.X. boshqaruvida bo‘lgan Cobalt hamda 1997-yilda tug‘ilgan haydovchi D.T. boshqaruvida bo‘lgan ‘Vaz-2107’ avtomobil ishtirokida to‘qnashuv sodir bo‘lgan. To‘qnashuv natijasida ‘Vaz-2107’ haydovchisi D.T. tan jarohatlari bilan shifoxonada vafot etgan. Shuningdek, ushbu avtomobil yo‘lovchisi 1996-yilda tug‘ilgan Sh.H. tan jarohati bilan shifoxonaga yotqizilgan”, — deyiladi rasmiy tashkilot axborotida.

Qo‘shimcha qilinishicha, mazkur YTH yuzasidan Qarshi tuman prokuraturasi tomonidan tergovoldi surishtiruv harakatlari olib borilmoqda.