Йўл ҳаракати хавфсизлиги бўлимларидаги имтиҳон олиш учун ўрнатилган тест саволлари замон талабига жавоб бермайди. Бу ҳақда Олий Мажлис Сенати эксперти Носиржон Зокиров «Дарё» мухбирига берган интервьюсида айтиб ўтди.
Носиржон Зокировнинг фикрича, Ўзбекистонда ҳайдовчиларни тайёрлаш ва имтиҳон тизими издан чиққан.
«Эксперт сифатида, инструкторлардан аттестация оладиган мутахассис сифатида шуни айтоламанки, автомактаб ўқитувчиларидан баъзиларининг саъвияси тушиб кетган. Ўқитувчилар оддий тест саволларини ҳам ишлай олмайдиган ҳолатларга гувоҳ бўлдим. Бундай ўқитувчи қандай қилиб ўқувчига бирон нарса ўргатиши мумкин? ‘Устоз мана буни тушунтириб беринғ, деса-ю ўқитувчи тушунтириб бера олмаса, у қандай ўқиш бўлди?», — деди эксперт.
Экспертнинг алоҳида таъкилашича, амалдаги йўл ҳаракати хавфсизлиги бўлимларидаги имтиҳон олиш учун ўрнатилган тест саволлари замон талабига жавоб бермайди.
«Биринчидан, тест саволарида ноўрин — йўл ҳаракати қоидаларида мавжуд бўлмаган саволлар бор. Тасаввур қилинг, машғулот ўтдим: йўл ҳаракати қоидалари фалон-фалон банди ҳақида ўқувчига гапирдим. Ўқувчи тестга тайёргарлик кўряётганда мен айтган гапнинг акси бўлиб чиқса, ‘Устоз бу нима деган нарса, сиз бунақа деяпсиз, қоидада бунақа ёзилган’, деб сўрайди. Шундан кейин ўқувчида ўқишга ишонч йўқолади. Иккинчидан, имтихонлар ишончли ва қаттиқ тартибда ўтказилиши шарт. Мисол учун, французларнинг ‘Такси’ деган фильмини кўпчилигимиз кўрганмиз. Ўша фильмда инспектор ҳайдовчилик гувоҳномасини олиш учун саккиз марта имтиҳон топшириб ҳам синовдан ўтолмайди. Шунда унинг онаси ‘Сенинг отанг йигирма марта имтиҳон топшириб ҳам ўтолмаган’, деб уни юпатади. Мана, ҳақиқий имтиҳон қаерда? Агар одам йигирма марта бориб ҳам имтиҳон топширолмаса, яхши ўқитадиган мактаб қидиради. Шунда нопок мактаблар ўзидан ўзи йўқ бўлиб, ёпилиб кетади», — деди Носиржон Зокиров.
Маълумотларга кўра, бир автомактабнинг 75 фоиз битирувчиси биринчи имтиҳондан ўтган. Бир ҳафтадан кейин ўзлаштириш даражаси юз фоиз бўлган.
«Бу ишониш қийин бўлган статистика. Агар ўқувчи ўқимаган, амалий машқларни бажармаган бўлса, у ўн марта имтиҳон топшириб ҳам синовдан ўтолмайди», — дея имтиҳон синовлари ҳақидаги рақамларга шубҳа билдирди Олий Мажлис Сенати эксперти.
Аввалроқ Ўзбекистон мудофаасига кўмаклашувчи «Ватанпарвар» ташкилоти раҳбари Ҳусан Ботиров пул эвазига ҳайдовчилик гувоҳномасини олиб беришни сўрайдиганлар борлигини айтиб ўтган эди. Шунингдек, у йўл-транспорт ҳодисасини содир этган ҳайдовчини ўқитган инструкторни жазолаш йўлга қўйилаётгани ва бу иш меҳнат қонунчилигига зид эмаслигини таъкидлаганди.
Изоҳ (0)