Аҳмад Қодиров фонди «краповий берет» синовларида юзага келган оммавий муштлашувда иштирок этган Чеченистон махсус бўлинмалари командирлари Анзор Бисаев ва Сайди Лорсанкаевга Mercedes автомобилларини совға қилди. Бу ҳақида Чеченистоннинг миллий сиёсат, ташқи алоқалар, матбуот ва ахборот вазири Аҳмад Дудаев маълум қилди, деб ёзади Meduza.

Фото: «РИА Новости»

«Уларнинг иккиси ҳам Чеченистоннинг биринчи президенти, Россия қаҳрамони Аҳмад Хожи Қодиров йўлида содиқ хизмат қилмоқда. Эгилмас ирода, мардлик ва улкан жасорат уларга ўз хизматида юқори натижаларга эришишда ёрдам бермоқда. ‘Краповий берет’ — махсус бўлинма хизматчиси жасоратининг олий рамзидир. Анзор ва Сайди унга 100 фоиз лойиқ эканлигини кўрсатди», — дейилади хабарда.

«Краповий берет» учун синовлар 11—15 октябрь кунлари «Росгвардия»нинг Ставраполдаги «Тамбукан» ўқув маркази базасида ўтказилган. Унда «Росгвардия»нинг Шимолий-Кавказ округи махсус бўлинмасининг юздан ортиқ хизматчиси иштирок этган. Синов якунлари бўйича 38 нафар жангчи, жумладан, чечинистонлик хизматчилар ҳам «краповий берет»га лойиқ кўрилган.

«Комсомолская Правда» мухбири Александр Коцнинг айтишича, «краповий берет»га номзод чеченистонликлар синовнинг бир қисми ҳисобланган марш-юриш давомида автомобилда ҳаракатланган. Натижада Чеченистон ҳарбий хизматчилари ва синовларнинг бошқа вилоятлардан келган иштирокчилари ўртасида жанжал юзага келган. Муштлашув видеоси ижтимоий тармоқларда тарқалган. Коц, шунингдек, чеченистонлик айрим иштирокчиларда бошқа синовларни босиб ўтишда муаммолар юзага келган, аммо улар барибир «краповий берет»ни олганини айтди.

«Росгвардия» расмий вакили Валерий Грибакиннинг маълум қилишича, синовларда «бирор жанжал, бунинг устига оммавий қарама-қаршилик» содир бўлмаган. Синовларни назорат қилиб борувчи «Краповий берет» кенгаши ҳам иштирокчилар ўртасида можаро юз бермаганини билдирган.

Маълумот учун, «Краповий берет» — форма бош кийими. У СССР ИИВ махсус бўлинмаларида хизмат қилаётган ҳарбий хизматчиларнинг олий формаси ҳисобланган. 1991 йилдан бошлаб собиқ совет таркибида бўлган қатор давлатларда ҳам сақланиб қолган. Мазкур бош кийим мураккаб синовлардан ўтган хизматчиларга топширилади ва ғурур рамзи ҳисобланади.