АҚШ администрацияси 15 декабрга қадар мамлакатнинг 35-президенти Жон Кеннедининг ўлдирилишига боғлиқ янги материалларни эълон қилиш ниятида. Бу ҳақда Оқ уй томонидан эълон қилинган баёнотга таяниб, «ТАСС» хабар берди.

Унда келтирилишича, АҚШ Конгресси 1992 йилда Кеннедининг ўлдирилишига боғлиқ барча маълумотлар мудофаа, разведка, ҳуқуқ-тартибот органлари ёки мамлакат ташқи сиёсатига зарар келтирмаса, «босқичма-босқич ошкор этилиши лозим»лигини эълон қилган. Америка идоралари ушбу ҳужжатларни текшириш билан шуғулланмоқда.

АҚШнинг амалдаги президенти Жо Байден ушбу материалларни эълон қилиш тартибини тасдиқлаган. Уларнинг бир қисми 2021 йил 15 декабрда эълон қилиниши кутилмоқда. Бу ҳокимият вакилларининг эътирозига сабаб бўлмаган маълумотлар ҳисобланади.

Америка идоралари маълумотларнинг иккинчи қисми эълон қилинишини кечиктиришни сўраган. Тахминларга кўра, у 2022 йилнинг 15 декабрига қадар ошкор этилмайди. Баёнотда таъкидланишича, бу борадаги олдинги тавсиялар АҚШ Миллий архивлар ва ёзувлар бошқармаси раҳбарияти томонидан берилган.

Эслатиб ўтамиз, 2017 йилда АҚШда КГБ агентининг Жон Кеннедининг ўлдириб кетилиши ҳақидаги иш бўйича кўрсатмалари эълон қилинганди. Эълон қилинган материаллар орасида КГБ (Собиқ Иттифоқда Давлат хавфсизлиги қўмитаси) агенти Юрий Носенко билан интервьюдан 17 та аудиофайл бор, у 1964 йил январида, Кеннедининг ўлимидан кейингина АҚШга қочиб ўтган эди.