Грузия собиқ президенти Михаил Саакашвилига шифокорлар томонидан қон қуйиш амалиёти бажарилгач, унинг соғлиғи барқарорлашди. Бу ҳақда собиқ президентнинг шахсий шифокори Николоз Кипшидзега таяниб, «Интерфакс» хабар берди.
«Саакашвилидан олинган қон таҳлилларидан бири ёмон чиққанди, шу сабабли маҳаллий қамоқхона шифокорлари ва реанимобил бригадаси менга қон қуйишда ёрдам берди, шундан кейин Саакашвилининг аҳволи барқарорлашди», — дейди Кипшидзе.
Унинг ҳисоблашича, Саакашвилини шаҳар клиникасига, шифокорлар назорати остига жойлаштириш керак, чунки «ҳолат яна такрорланиши мумкин, қамоқхона шифохонасида эса унга ёрдам кўрсатиш қийин бўлади».
«Ҳозирда Саакашвилининг соғлиғи кечагидан кўра қониқарли», — дейди Кипшидзе.
Эслатиб ўтамиз, 1 октябрь куни Михаил Саакашвили саккиз йилдан буён биринчи марта Грузияга келди. У чегарани ноқонуний кесиб ўтганлик айблови билан қўлга олинди. Шундан кейин Грузияда мухолифат норозилик намойишлари бошланди, улар Саакашвили озод этилишини талаб қилди.
Мавзуга доир: «Миша, биз келдик». Саакашвилининг қайтиши ва қамоққа олиниши қандай қилиб Грузияни иккига бўлиб юборди?
Аввалроқ шифокорлар консилиуми Грузия соғлиқни сақлаш вазирлиги вакиллари ва қамоқхонадаги тиббиёт ходимлари иштирокида уни кўрикдан ўтказганди. Улар собиқ давлат раҳбарининг анча куч йўқотгани, бироқ унинг соғлиғига хавф соладиган касалликлар йўқлиги ҳақида ташхис қўйган. Консилиум Михаил Саакашвилини шифохонага кўчиришни тавсия этган.
Грузия адлия вазири Рати Брегадзе шифокорлар кенгашига жавобан уларнинг барча тавсияларига қатъий риоя этилишини билдирган. Вазир Михаил Саакашвили шифохонага ўтказилиши, бироқ бу унинг партиядошлари ҳамда тарафдорлари истаганидек фуқаролик муассасаси, шаҳар касалхонаси эмас балки жазони ижро этиш масканидаги тиббиёт бўлими бўлишини тушунтирган.
Изоҳ (0)