Россияда ўтган бир сутка ичида яна 37 678 кишида коронавирус тасдиқланди. Бу ҳақда COVID-19 га қарши кураш бўйича федерал тезкор штабга таяниб, Meduza хабар берди. Бу мамлакатда пандемия бошланганидан буён кунлик касалланиш бўйича рекорд кўрсаткич ҳисобланади.
Фото: РИА Новости
Шунингдек, ўтган бир сутка давомида 1075 киши коронавирус асоратлари оқибатида вафот этган — бу ҳам антирекорд.
Тезкор штаб маълумотларига кўра, Россияда коронавирусга чалинганларнинг умумий сони 8 205 983 кишига етган, ҳозирга қадар 228 528 киши COVID-19 қурбонига айланган.
Россия президенти Владимир Путин мамлакатда коронавирус инфекцияси билан касалланиш ҳолатлари ортаётгани сабаб 30 октябрдан 7 ноябрда қадар (4 ноябрь куни Халқ бирлиги куни нишонланади, 5 ноябрдан 7 ноябргача шундоқ ҳам дам олиш кунлари эди) ишга чиқилмайдиган ҳафталик дея эълон қилган. Эпидемиологик вазият кескин тус олган вилоятларда ишланмайдиган ҳафталикни олдинроқ жорий этишга рухсат берилган. Масалан, Москва ва Москва вилоятида ишга чиқилмайдиган кунлар 28 октябрдан бошланади.
Аввалроқ Россияда COVID-19 нинг янги тўлқини юз бераётгани, бунга коронавирус дельта («ҳиндча») штамми билан боғлиқ вазият сабаб бўлгани тўғрисида хабар берилганди. Калининград вилоятида «COVID-19 билан боғлиқ ўта оғир вазият» туфайли мунтазам тиббий ёрдам кўрсатиш тўхтатилиши, кафе ва ресторанлар (8 октябрдан уларга сертификатсиз кириш тақиқланган) билан бирга барча жамоат жойларида QR-код тизими жорий этилиши мумкин. Ҳозирда Новосибирск, Свердловск ва Смоленск вилоятлари, Карелия, Мари Эл ва Коми Республикасида QR-код тизимининг у ёки бу шаклда жорий этилиши эълон қилинган.
