Ўзбек сўми 2021 йил бошидан бери 2 фоизга қадрсизланди

2021 йил бошидан буён ўзбек сўмининг девальвацияси 2 фоиздан ортиқроқни ташкил этди. Бу ҳақда 21 октябрь куни ўтказилган брифингда Марказий банк раиси Мамаризо Нурмуратов маълум қилди, деб хабар беради Spot.

Марказий банк томонидан ўрнатилган доллар курси 1 январда 10 476 сўмни ташкил этган бўлса, 21 октябрда 10 682 сўмга етган. Қарийб 10 ой ичида курс 1,96 фоизга ўсган.

Регулятор раҳбарининг таъкидлашича, айирбошлаш курсининг нисбатан барқарор кўрсаткичига экспортдан келадиган валюта фойдасини 35 фоизга ошириш, шунингдек, банк ва экспортёрлар томонидан валюта савдолари ҳажмининг ўсиши ҳисобига эришилган: 9 ой ичида улар валюта биржаларида 9,5 миллиард доллар валюта сотган, бу 2020 йилга нисбатан 85 фоизга кўп демак (5,2 миллиард доллар).

Нурмуротовнинг сўзларига кўра, буни иқтисодиётда амалга оширилаётган ислоҳотларнинг очиқлик ва шаффофлиги натижаси деб аташ мумкин.

Шундай қилиб, 2021 йилнинг январь—сентябрь ойларида Марказий банк томонидан олтин-валюта захираларининг нейтраллиги тамойили асосида сотиб олинган олтин доирасида ички валюта бозорида сотилган валюта маблағлари ҳажми ўтган йилнинг мос даврига нисбатан 32 фоизга камайган. Корхоналарнинг импорт тўловлари ҳам 25 фоизга ошган. Шу билан бирга, сентябрь ойида импорт тўловлари манбалари таркибидаги бизнеснинг хорижий валютадаги улуши 29 фоизга етган.

Умуман олганда, ушбу тенденциялар ички валюта бозорининг ўзини ўзи молиялаштириш имкониятлари изчил кенгайиб бораётганидан далолат беради.

Ўтган йиллар давомида сўмнинг қиймати кескин тушиб кетганди — 2020 йилда бу апрель ойида, 2019 йилда эса август ойида содир бўлган. Биринчи ҳолатда бунга пандемия, иккинчисида — асосий савдо ҳамкорлари бозоридаги вазият сабаб бўлган.

2020 йилда миллий валюта долларга нисбатан 10,1 фоизга қадрсизланган.

Базавий сценарийга кўра, Марказий банк 2021 йилда валюта курсининг кескин ўзгаришини кутмаяпти. Регулятор буни ташки савдо ва соф экспорт ҳажми, шунингдек, пул ўтказмалари ўсишининг барқарорлашиши билан изоҳламоқда.

Аввалроқ Марказий банк асосий ставкани ўзгаришсиз қолдирганига изоҳ берганди.