O‘zbekistonning rasmiy zaxira aktivlari 1-oktabr holatiga ko‘ra 34,41 milliard dollarni tashkil etdi. Bu haqda Markaziy bank ma’lumotlarida keltirilgan.
Foto: Bloomberg
Spot’ning qayd etishicha, sentabr oyi bilan taqqoslaganda bu ko‘rsatkich 1,02 milliard dollarga yoki 2,9 foizga kamaydi. Yo‘qotishlarning yarmi oltinga to‘g‘ri keldi. Bir oy davomida uning miqdori 200 ming troya unsiyasiga oshdi, lekin uning umumiy qiymati 528 million dollarga kamaydi. O‘shanda oltinning bir unsiyasi 1762 dollar atrofida edi, 1-oktabr holatiga ko‘ra — 1760 dollar. Biroq hozir ushbu qimmatbaho metallning bir troya unsiyasi narxi 1775 dollargacha ko‘tarildi.
Hozirda O‘zbekistonda 21,345 milliard dollarlik oltin zaxirasi bor — bu 12,3 million troya unsiyani tashkil etadi (taxminan 382,6 tonna bo‘lib, o‘tgan oyga qaraganda 6 tonnaga ko‘p).
Zaxiralar kamayishining qolgan yarmi xorijiy valyutadagi aktivlarga to‘g‘ri kelgan bo‘lib, u pasayishda davom etmoqda. Sentabr oyida valyutadagi aktivlar 479 million dollardan 11,95 milliard dollargacha kamaydi.
Hozirgi zaxiralar 18 oydan ortiq vaqt davomida importni moliyalashtirishga yetadi. Bu rivojlanayotgan mamlakatlar uchun xalqaro tashkilotlar tomonidan tavsiya etilgan 3 oylik darajadan ancha yuqori.
Zaxiralar, shu bilan birga, mamlakatning “xavfsizlik yostiqchasi” sifatida qaraladi — ular salbiy tashqi shok holatlarda zarbani kamaytiruvchi omil sifatida zarur va zaxiralarning yetarliligi shok holatlarning xususiyatiga bevosita bog‘liq.
