Тошкент шаҳри Яккасарой туманида 20 октябрь куни қайта таъмирланган собиқ «Бобур» маданият ва истироҳат боғи «Дўстлик» номи билан фойдаланишга топширилди.
Маълум бўлишича, боғнинг очилиш маросимида Тошкент шаҳар ҳокимлиги, Миллатлараро муносабатлар ва хорижий мамлакатлар билан дўстлик алоқалари қўмитаси ходимлари, турли миллат вакиллари иштирок этган. 12 гектарли боғда спорт майдонлари, кутубхона ва болалар майдончалари қурилган. Ҳудудда 5 минг тупга яқин дарахт экилиб, 2 та сув ҳавзаси таъмирланган, дея хабар қилди ЎзА.
«UzReport»нинг хабар беришича, боғда автодром майдони, Урбан парк майдончаси, аҳоли учун пиёда юриш, югуриш йўлаклари, янги 2 та замонавий мини футбол стадиони ҳамда ёзги кинотеатр ташкил этилган.
Реконструкция аввалида фуқаролар ва журналистлар билан боғнинг қурилишдан кейинги кўриниши бўйича маслаҳатлашиб олинган. Шунингдек, ижтимоий тармоқда ҳам саҳифа очилган ва мажмуа аҳолининг талаб-истаклари асосида қуриб битказилган. Ҳудудда скейт учиш майдони, велойўлаклар ва шаҳмат-шашка ўйинлари ташкил этилган, деб хабар берди «Ўзбекистон 24».
Шавкат Мирзиёев 2017 йил 24 январь куни Республика Байналминал маданият маркази 25 йиллиги муносабати билан ўтказилган учрашувда «Бобур» боғини «Дўстлик» боғи деб қайта номлашни таклиф қилганди.
Изоҳ (0)