Наманган вилояти ҳудудида содир бўлган йўл-транспорт ҳодисаси оқибатида бир киши ҳалок бўлди. Бу ҳақда вилоят ИИБ ахборот хизмати хабар берди.

Фото: ФВВ матбуот хизмати

Маълум қилинишича, 15 октябрь куни соат 00:30 ларда Тошкент—Ўш йўлининг 246 километрида, Поп тумани «Қўшминор» МФЙ ҳудудида Андижон вилоятида яшаган 29 ёшли фуқаро Isuzu русумли юк машинасини бошқариб бораётиб, ҳаракат хавфсизлигини таъминлай олмай қолган. Оқибатда у шу йўналишда, ўзидан олдинда ҳаракатланиб кетаётган 32 ёшли фарғоналик ҳайдовчи бошқарувидаги Kia-Bongo’нинг орқа қисмига келиб урилган. Тўқнашув натижасида Isuzu йўлнинг ўртасидаги темир тўсиққа урилган ва ағдарилиб кетган.

Содир бўлган авария оқибатида Isuzu русумли юк автомашина ҳайдовчиси олган тан жароҳати оқибатида шифохонага олиб кетилаётган вақтида вафот этган. Kia-Bongo русумли автомашина ҳайдовчиси бош мия лат ейиши, бошининг тепа қисми йиртилиши ташхиси билан тан жароҳати олиб, шифохонага ётқизилган.

Ҳолат бўйича Поп туман ИИБ ҳузуридаги Тергов бўлими томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан жиноят иши қўзғатилган.

Аввалроқ Қамчиқ довонида MAN юк машинаси ЙТҲга учрагани, Наманганда юк машинаси ағдарилиши оқибатида Қозоғистон фуқароси вафот этгани тўғрисида хабар берилганди.