Жанубий Корея «Нури» деб номланган биринчи космик ракетаси воситасида бир ярим тонна вазндаги сунъий йўлдош макетини фазо орбитасига чиқара олмади. Бу ҳақда Yonhap агентлиги хабар берди.
200 тонналик KSLV-II ракета-ташувчиси Сеулдан 473 километр узоқликдаги Венардо оролидаги «Наро» космодромидан маҳаллий вақт билан соат 17:00 да парвозни амалга оширган. Парвоз, тахминан, 16 дақиқа давом этган.
Ракета 700 километрлик баландликка чиқа олди, аммо орбитага сунъий йўлдош макетини етказа олмади, деган Жанубий Корея президенти Мун Чжэ Ин «Наро» миллий космик марказидаги нутқида.
Мамлакат илм-фан ва техника вазирлиги берган маълумотларга кўра, ракетанинг дастлабки икки қисми режа бўйича ажралган, учинчиси эса режалаштирилган вақтдан 50 сония аввал ёнган.
«‘Нури’нинг синов парвози амалга оширилди. Мазкур иш амалга ошганидан фахрланаман. Афсуски, биз ўз олдимизга қўйган мақсадимизни тўлиқ амалга ошира олмадик, лекин биринчи парвозда мақтанишга арзийдиган натижа қайд этдик», — деган Жанубий Корея президенти.
Шунингдек, давлат раҳбари «Нури»нинг кейинги парвози 2022 йилда амалга оширилиши режалаштирилганини ҳам маълум қилган.
2010 йилдан бери Жанубий Корея «Нури»ни бунёд этиш учун қарийб икки триллион вон (1,8 миллиард АҚШ доллари) инвестиция жалб этган. Ракетани қуриш ва уч босқичда парвозни амалга ошириш мамлакат ҳудудида Жанубий Корея технологияси воситасида қилинди.
KSLV-II ракетаси орбитага сунъий йўлдошларни олиб чиқиш, яъни тижорий мақсадлар учун мўлжалланган. «Интерфакс»нинг қайд этишича, бу каби ракета парвозини амалга оширишга 30 миллион доллар сарфланади ва бу Осиёдаги бошқа рақобатчилар харажатларидан арзонроқ тушган.
«Нури»нинг парвози муваффақиятли амалга оширилганида Жанубий Корея ўзи ишлаб чиқарган ракетада бир тоннадан оғирроқ жисмни орбитага олиб чиққан дунёдаги еттинчи мамлакатга айланарди. Айни вақтда Россия, АҚШ, Франция, Хитой, Ҳиндистон ва Япония мазкур вазифани уддалаган етакчи олти мамлакат ҳисобланади.
Изоҳ (0)