Шифокорлар қамоқхонада очлик эълон қилган Саакашвилини касалхонага ётқизишни тавсия қилди

20 кундан буён Рустави шаҳридаги қамоқхонада очлик эълон қилиб келаётган Грузия собиқ президенти Михаил Саакашвилини шифокорлар консилиуми кўрикдан ўтказиб, уни интенсив кузатув учун касалхонага юборишни тавсия қилди. Бу ҳақда беш нафар бошқа тиббиёт ходимлари билан бирга Саакашвилини текширган шифокор Зураб Пагава маълум қилди, деб ёзади Meduza.

«Саакашвилининг саломатлиги ҳар қандай вақтда ёмонлашиши мумкин, унинг аҳволи билан боғлиқ асоратлар олдини олиш учун биз касалхонага ётқизишни тавсия қилдик», — деди Пагава.

Саакашвилини қамоқхонадан клиникага ўтказиш ҳақидаги қарорни Грузия адлия ва соғлиқни сақлаш вазирлари, шунингдек, маҳаллий парламент аъзолари қабул қилиши керак. Мамлакат учинчи президентининг шахсий шифокори Николоз Кипшидзе таъкидлашича, касалхонага ётқизишга Саакашвилининг ўзи розилик бериши керак. У собиқ президент 23 октябрда касалхонага юборилишини тахмин қилди.

Николоз Кипшидзе қўшимча қилишича, Саакашвилининг аҳволи «худди кечагидек» барқарор.

1 октябрь куни Михаил Саакашвили саккиз йилдан буён биринчи марта Грузияга келди. У чегарани ноқонуний кесиб ўтганлик айблови билан қўлга олинди. Шундан кейин Грузияда мухолифат норозилик намойишлари бошланди, улар Саакашвили озод этилишини талаб қилди.

2018 йилда Михаил Саакашвили Грузияда иккита жиноий иш бўйича сиртдан судланганди: у парламент собиқ депутати Валерий Гелашвилига ҳужум уюштирганликда айбланиб олти йилга, банк ходими Сандро Гиргвлианининг ўлдирилишига алоқадорлик айблови бўйича эса уч йилга озодликдан маҳрум қилинди.