18 октябрь куни эрталаб Россиянинг Перм шаҳри яқинидаги Сарс қишлоғида 12 ёшли ўспирин мактабга ов карабини (қисқа стволли милтиқ) билан келиб, ўт очди. Бу ҳақда «Интерфакс» ўз манбасига таяниб хабар берди.

Фото: «РИА Новости»

Олтинчи синф ўқувчиси шифтга ва деворга қарата иккита ўқ узган, шундан кейин уни қўлга олишган. Ҳодиса дарслар бошланишидан олдин юз берган, унинг натижасида ҳеч ким жабрланмаган.

Отишма чоғида мактабда 300 дан ортиқ ўқувчи ва 30 нафар педагог бўлган. Уларнинг барчаси мустақил равишда бинони тарк этган.

База маълумотларига кўра, ўспириндан қуролни мактаб директори олиб қўйишга муваффақ бўлган — у болани суҳбатлашиш учун ўз кабинетига киришга ва қуролни беришга кўндирган.

«Интерфакс» манбаси айтишича, ўқувчи ўзини номутаносиб тутган. «Ҳавога ўқ узаётиб, у пойма-пой жумлаларни бақириб айтарди, уни қўлга олиш пайтида эса ‘худонинг кўрсатмаларига’ риоя қилаётганини айтиб қичқирди», — деди у. Қўлга олинган ўқувчи психиатрик экспертизага йўналтирилади.

Ўспириннинг ўзи мактабда унга азоб беришганини маълум қилди. «Ҳибсга олинган ўсмир ушбу қилмишига синфдошларининг ёмон муносабатлари, ҳадеб хафа қилишлари, шунингдек, буллинг сабаб бўлганини айтди», — деди манба.

Дастлабки маълумотларга кўра, ўспирин қуролни отасидан олган. У расман рўйхатдан ўтказилган ва ҳисобда туради.

«ТАСС» манбасига кўра, отишма содир этган мактаб ўқувчиси жиноий жавобгарликка тортилмайди.

Эслатиб ўтамиз, 20 сентябрь куни тонгда Перм давлат миллий тадқиқотлар университети талабаси Тимур Бекмансуров олийгоҳ ҳудудига милтиқ билан кирди ва йўлида учраган одамга ўқ уза бошлади. Ҳодиса туфайли талабалар деразалардан ташқарига сакраган. Кўпчилик ўз синфхонасида баррикадалар қуриб ўралиб олган. Ҳужумчи камида 30 марта ўқ узган, тахминларга кўра, ўқлар Ҳуглу 12 калибрли силлиқ стволли қуролдан отилган. Оқибатда олти киши ҳалок бўлиб, 43 киши жабрланди.