ОnеPlus 500 долларлик флагманини тақдим этди

Хитойнинг ОnеPlus компанияси Snapdragon 888 процессори ўрнатилган ОnеPlus 9R моделини тақдим этди, деб хабар беради Hi-Tech.Mail.ru.

Смартфонга пикселлари нисбати 1080х2400 бўлган, тасвир янгиланиш частотаси 120 герцга тенг 6,62 дюймли АМOLED-экран ўрнатилган. Дисплейнинг энг юқори ёрқинлиги — 1300 нит.

Мазкур қурилманинг ўзидан олдинги моделдан асосий фарқи процессорида: ОnеPlus 9RТ’6га Qualcomm Snapdragon 870 ўрнатилган бўлса, янги смартфон Snapdragon 888 чипида ишлайди. Шунингдек, унга 8 ёки 12 гигабайтли LPDDR5 тезкор хотираси, 128 ёки 256 гигабайт UFS 3.1 ички хотираси ўрнатилади.

Таъкидлаш керакки, янги моделнинг совитиш тизими яхшиланган — ишлаб чиқарувчининг маълум қилишича, у 20 фоизга самарадорроқ. Смартфон Android 11 базасидаги ColorOS 11 операцион тизими ёрдамида бошқарилади.

Учталик камеранинг асосий датчиги 50 мегапикселли Sony IMX766 бўлиб, у оптик барқарорлаштиргичга ҳам эга. Бундан ташқари, 16 мегапикселли ўта кенг бурчакли ва 2 мегапикселли макродатчиклар мавжуд. 16 мегапикселли селфи-камера сониясига 30 кадр тезлигида 1080р видеоларни ёзишга қодир (тасвирни электрон барқарорлаштириш функциясига эга).

Аккумулятор сиғими 4500 мА/соат, 65 ваттли тезкор қувватланиш функцияси мавжуд. Қурилма ўйин вақтида сигнални узлуксиз қабул қилиш учун унга учта Wi-Fi антенна ўрнатилган.

Хитойда 19 октябрдан сотувга чиқадиган смартфон нархи 3300 юанни (513 доллар) ташкил этади.

Аввалроқ ОnеPlus’нинг собиқ директорига тегишли бренд шаффоф Nothing Ear TWS-наушникларини тақдим этгани, ОnеPlus халқчил Nord 2 смартфони ва Buds Pro симсиз наушнигини намойиш этгани тўғрисида хабар берилганди.