Microsoft компанияси ўзининг биринчи ўйин приставкасини тақдим этганига 20 йил тўлганини нишонламоқда. Шу муносабат билан компания Xbox контроллери ва гарнитурасининг юбилей версияларини тақдим этди, деб хабар беради «Afisha.uz».
Маълумот учун, оригинал Xbox биринчи бор 2001 йилнинг 15 ноябрида сотувга чиққан.
Биринчи янгилик — 20th Anniversary Special Edition Xbox Wireless Controller номли шаффоф контроллери. Компаниядагиларнинг маълум қилишича, ярим шаффоф «вставка»ли контроллер дизайнини яратишда дастурчилар учун мўлжалланган оригинал Xbox Debug’дан илҳомланилган. Шаффоф панель орқали кумуш рангли ички компонентларни кўриш мумкин.
Контроллернинг ушлагич қисми, гибрид «крестовина» ва Xbox тугмаси яшил рангга бўялган. Бу каби дизайн орқали биринчи Xbox логотипига шама қилинади.
Microsoft ҳозирда 20th Anniversary Special Edition Xbox Wireless Controller учун буюртмаларни қабул қилмоқда.
Xbox 15 ноябрдан сотувга чиқади ва унинг АҚШдаги нархи 70 доллардан бошланади.
Xbox юбилейи муносабати билан тақдим этилган иккинчи янгилик — Xbox Stereo Headset гарнитураси. У ҳам ёрқин яшил элементлар билан бирга ярим шаффоф корпусга эга бўлган. Мазкур наушник нархи ҳам 70 долларни ташкил этади.
Эслатиб ўтамиз, 2021 йилнинг мартида Sony компанияси ўзининг PlayStation 5 приставкаси учун шарсимон кўринишдаги қатор имкониятларга, жумладан, сенсорли аниқлаш тизимига эга контроллерни тақдим этганди.
Изоҳ (0)