OnePlus’ning sobiq direktori Karl Peyga tegish brend o‘zining birinchi mahsuloti — shaffof elementlarga ega Nothing Ear (1) TWS-naushniklarini taqdim etdi, deb xabar beradi “Afisha.uz”.

Foto: “Afisha.uz”

“Oyoqchasi”da shaffof elementlarga ega naushniklarning har biri oq va qora ranglarga bo‘yalgan. Ular ichida 11,6 millimetrli drayver va uchtadan mikrofon joylashgan bo‘lib, bu faol shovqin so‘ndirish tizimining ishlashini ta’minlaydi. Shuningdek, “shaffof” rejim ham mavjud va gadjet IPX4 standarti bo‘yicha himoyalangan.

Foto: “Afisha.uz”

Naushnikning kvadrat shaklidagi quvvatlantirish keysi shaffof qopqoqqa ega va u simsiz yoki USB Type-C orqali quvvatlana oladi. Uning ichida sig‘imi 570 mA/soatga teng akkumulyator joylashgan bo‘lib, 10 daqiqali quvvatlanish naushniklarning 80 daqiqa ishlashini ta’minlashga qodir. Ishlab chiqaruvchining ma’lum qilishicha, naushniklar bir marta quvvatlanish orqali shovqin so‘ndirish funksiyasi yoqilgan holda 4 soat, o‘chirilgan holda esa 5,7 soat ishlay oladi.

Gadjetning o‘zining maxsus mobil ilovasi orqali sozlash mumkin. U yerda naushnik va uning keysini quvvati ham ko‘rsatiladi. Shuningdek, qo‘l xatti-harakatlari yordamida boshqaruv, intensiv shovqin so‘ndirish va ekvalayzerni boshqarish imkoniyati bor. SBC va AAC kodeklarini qo‘llab-quvvatlaydi.

Foto: “Afisha.uz”

Mazkur naushniklarni Buyuk Britaniya, Hindiston, Yevropa davlatlari va Shimoliy Amerikada 31-iyuldan boshlab 117 dollarga xarid qilish mumkin.

Avvalroq yangi LG naushniklarida shivirlab gapirish imkonini beradigan rejim paydo bo‘lgani, McLaren kompaniyasi karbon korpusli simsiz naushniklarini taqdim etgani to‘g‘risida xabar berilgandi.