Россия Марказий Осиё давлатларига АҚШ ҳарбийларининг жойлаштирилишини қабул қилмайди. Бу ҳақда Россия ташқи ишлар вазири ўринбосари Сергей Рябков АҚШ давлат котиби ўринбосари Виктория Нуланд билан учрашувдан сўнг маълум қилди.
«Биз Марказий Осиё мамлакатларида ҳар қандай шаклдаги Америка қўшинларининг бўлиши қабул қилинмаслигини билдирдик», — деди Рябков. У Нуланд билан Афғонистон мавзусини муҳокама қилганини таъкидлади. АҚШ давлат котибининг ўринбосари Москвага учиб келган ва икки томонлама муносабатлар, глобал ҳамда минтақавий муаммоларни муҳокама қилган.
Қўшма Штатларнинг Афғонистондаги вазиятни биргаликда назорат қилиш учун Марказий Осиё мамлакатларидан, хусусан Тожикистон ва Қирғизистондаги Россия базаларидан фойдаланиш эҳтимоли июнь ойида муҳокама қилинган эди.
«Коммерсантъ» нашрининг ёзишича, июнь ойида Женевада бўлиб ўтган саммит чоғида Россия президенти Владимир Путин АҚШ президенти Жо Байденга бу икки мамлакатдаги Россия базаларидан фойдаланишни таклиф қилган. Қайд этилишича, бу АҚШ ва Россияга олинган маълумотларни алмашишда ёрдам беради. Июль ойида Россия президенти матбуот котиби Дмитрий Песков бу хабарларни на тасдиқлаши ва на инкор этишини айтди.
Кейинроқ сентябрь охирида The Wall Street Journal (WSJ) ўз манбаларига таяниб, АҚШ Қуролли кучлари бош штаби раиси, генерал Марк Милли ва Россия Қуролли Кучлари Бош штаби бошлиғи Валерий Герасимов, Финляндиядаги йиғилишда АҚШ ҳарбийларининг Марказий Осиёдаги Россия базаларидан фойдаланиш имкониятларини муҳокама қилгани ҳақида ёзди.
Пентагон раҳбари Ллойд Остин ҳам буни тасдиқлаган. Унинг сўзларига кўра, Америка қўшинлари Афғонистондаги базаларини тарк этгач, террорчилик таҳдидларга жавоб бериш учун Москва АҚШга Осиёдаги базаларидан фойдаланишни таклиф қилган.
Изоҳ (0)