Россиянинг Mail.ru Group корпорацияси ўз номини VK’га ўзгартиради. Бу ҳақда компания бош директори Борис Добродеевга таяниб Meduza хабар берди.
Добродеевнинг сўзларига кўра, компаниянинг янги ва ягона VK бренди нафақат корпоратив даражада, балки «бир-бири билан боғлиқлиги фойдаланувчиларга ҳар доим ҳам маълум бўлавермайдиган маҳсулотларда» намойиш этилади.
«Компаниянинг ягона бренди бизнинг экотизимимиз тақдим этадиган барча имкониятларни — мулоқот ва ўйинлар, таълим (мактабдан то профессионал даражагача), дори-дармон ва озиқ-овқат етказиб бериш, такси, автомобиль алмашиш, онлайн харидлар ва бошқаларни акс эттиради», — деди Добродеев.
Компаниянинг баъзи лойиҳалари ва сервислари қайта номланади ҳамда уларнинг номлари ва логотипларига VK олд қўшимчаси қўшилади. Хусусан номлар қуйидагича ўзгаради:
- «VK Музика» (мусиқа, собиқ Боом);
- «VK Работа» (иш, собиқ Work);
- «VK Объявления» (эълонлар, собиқ Юла);
- «VK Знакомства»(танишув, собиқ Ловина).
Маълумот учун, Mail.ru Group 2014 йилда «ВКонтакте»нинг эгасига айланганидан сўнг VK брендини фаол ривожлантира бошлади. Mail.ru Group’нинг ўзи 2005 йилда ташкил этилган. Компания шу пайтгача бирор марта ҳам ўз номини ўзгартирмаганди.
Изоҳ (0)