Буюк Британиядаги супермаркетларда озиқ-овқат маҳсулотлари тугаб бормоқда, чунки британияликлар таклиф етишмаслиги туфайли маҳсулотларни захиралаб қўймоқда. Миллий статистика бошқармаси маълумотига кўра, ваҳима билан маҳсулотларнинг керагидан ортиқ сотиб олиниши туфайли 25 сентябрдан 9 октябргача мамлакатда ҳар олтинчи одамга асосий озиқ-овқат маҳсулотлари етмай қолган.
The Grocer журнали 1000 истеъмолчи орасида сўров ўтказиб, уларнинг учдан икки қисми Рождество арафасида озиқ-овқат ва ичимлик етишмай қолишидан «хавотирда» ёки «чуқур ташвишда» эканини аниқлади.
Супермаркетлар ҳайдовчилар етишмаслиги туфайли таъминотдаги узилишлар ва пештахталарнинг бўшаб қолишига қарши курашмоқда. Транспорт соҳасига яна 100 минг ходим зарур, чунки Brexit’дан кейин ва пандемия даврида меҳнат муҳожирлари мамлакатдан кенг миқёсда чиқиб кетган. Ишчиларнинг етишмаслиги меҳмонхона бизнеси, қишлоқ хўжалиги ва озиқ-овқат саноатига ҳам таъсир кўрсатди. Бундан ташқари, мамлакатда электр нархининг кўтарилиши туфайли кўплаб ўғит ишлаб чиқарувчилар ўз фаолиятини тўхтатишга мажбур бўлди, бу эса гўшт, парранда гўшти ва қадоқланган озиқ-овқат танқислигини келтириб чиқармоқда.
Британия ҳукумати ушбу муаммоларни ҳал қилиш бўйича чоралар кўрмоқда — яқинда ҳарбийларни маҳсулот етказиб беришга сафарбар қилиш бошланди. Қайд этилишича, ҳукумат ҳарбийларга байрам кунлари ҳам озиқ-овқат маҳсулотларини етказиб беришни буюриши мумкин.
Изоҳ (0)