Rossiya Markaziy Osiyo davlatlariga AQSh harbiylarining joylashtirilishini qabul qilmaydi. Bu haqda Rossiya tashqi ishlar vaziri o‘rinbosari Sergey Ryabkov AQSh davlat kotibi o‘rinbosari Viktoriya Nuland bilan uchrashuvdan so‘ng ma’lum qildi.
“Biz Markaziy Osiyo mamlakatlarida har qanday shakldagi Amerika qo‘shinlarining bo‘lishi qabul qilinmasligini bildirdik”, — dedi Ryabkov. U Nuland bilan Afg‘oniston mavzusini muhokama qilganini ta’kidladi. AQSh davlat kotibining o‘rinbosari Moskvaga uchib kelgan va ikki tomonlama munosabatlar, global hamda mintaqaviy muammolarni muhokama qilgan.
Qo‘shma Shtatlarning Afg‘onistondagi vaziyatni birgalikda nazorat qilish uchun Markaziy Osiyo mamlakatlaridan, xususan Tojikiston va Qirg‘izistondagi Rossiya bazalaridan foydalanish ehtimoli iyun oyida muhokama qilingan edi.
“Kommersant” nashrining yozishicha, iyun oyida Jenevada bo‘lib o‘tgan sammit chog‘ida Rossiya prezidenti Vladimir Putin AQSh prezidenti Jo Baydenga bu ikki mamlakatdagi Rossiya bazalaridan foydalanishni taklif qilgan. Qayd etilishicha, bu AQSh va Rossiyaga olingan ma’lumotlarni almashishda yordam beradi. Iyul oyida Rossiya prezidenti matbuot kotibi Dmitriy Peskov bu xabarlarni na tasdiqlashi va na inkor etishini aytdi.
Keyinroq sentabr oxirida The Wall Street Journal (WSJ) o‘z manbalariga tayanib, AQSh Qurolli kuchlari bosh shtabi raisi, general Mark Milli va Rossiya Qurolli Kuchlari Bosh shtabi boshlig‘i Valeriy Gerasimov, Finlyandiyadagi yig‘ilishda AQSh harbiylarining Markaziy Osiyodagi Rossiya bazalaridan foydalanish imkoniyatlarini muhokama qilgani haqida yozdi.
Pentagon rahbari Lloyd Ostin ham buni tasdiqlagan. Uning so‘zlariga ko‘ra, Amerika qo‘shinlari Afg‘onistondagi bazalarini tark etgach, terrorchilik tahdidlarga javob berish uchun Moskva AQShga Osiyodagi bazalaridan foydalanishni taklif qilgan.
Izoh (0)