Хоразм вилоятида Instagram ижтимоий тармоғи саҳифасидаги расмларни ўчириш эвазига пул талаб қилган шахс қўлга олинди, деб хабар беради Бош прокуратура ҳузуридаги департамент.
Маълум қилинишича, департаментнинг Хоразм вилоят бошқармаси томонидан фуқароларнинг қонуний ҳуқуқ ва манфаатларини ҳимоя қилиш юзасидан тезкор тадбир ўтказилган. Тадбир давомида М.Б. исмли шахс фуқаро С.нинг номига очилган Instagram ижтимоий тармоғи саҳифасидаги уни обрўсизлантирувчи расмларни ўчириш эвазига пул сўрагани аниқланган. У товламачилик йўли билан фуқародан акаси орқали 5 минг долларни талаб қилиб олган вақтида ашёвий далиллар билан ушланган.
Мазкур ҳолат юзасидан Жиноят кодексининг 165-моддаси (товламачилик) билан жиноят иши қўзғатилиб, терговга тегишлилиги бўйича юборилган.
Аввалроқ Тошкентда ишқий муносабатда бўлган «севган қизи»дан пул ундириб келган йигитга жиноят иши қўзғатилгани, Андижонда икки йигит танишининг телефонини тортиб олиб, ундаги интим видеоларни тарқатмаслик учун 10 минг доллар талаб қилгани, Наманганда Telegram’даги ёзишмаларини тарқатиш билан қўрқитиб, 17 ёшли қиздан 200 доллар талаб қилган йигит ушлангани тўғрисида хабар берилганди.
Изоҳ (0)