Ўзбекистонда товар ва хизматлар ҳақидаги маълумотларни давлат тилида кўрсатиш шарт этиб белгиланмоқда

Олий Мажлис Қонунчилик палатасининг 12 октябрдаги мажлисида «Истеъмолчиларнинг ҳуқуқларини ҳимоя қилиш тўғрисида»ги қонунга қўшимча ва ўзгартишлар киритиш ҳақидаги қонун лойиҳаси муҳокама қилинди. Бу ҳақда қуйи палата матбуот хизмати хабар берди.

Маълум қилинишича, қонун лойиҳасини маромига етказишда истеъмолчилар ҳуқуқларини кафолатлаш, сотувчи (ишлаб чиқарувчи, иш ва хизмат кўрсатувчи) масъулиятини янада оширишга қаратилган нормалар билан бойитилган.

Шунингдек, таъкидланишича, қонун лойиҳасидан ишлаб чиқарувчи ҳақида, савдо ва хизмат кўрсатиш қоидалари, товар тўғрисидаги ахборотни истеъмолчиларга давлат тилида тўлиқ етказиш, товарни экспертизадан ўтказиш ҳолатлари шартлиги ўрин олган.

«Бундан ташқари, лойиҳада ваколатли давлат органи ва нодавлат жамоат бирлашмаларининг истеъмолчилар ҳуқуқларини ҳимоя қилиш соҳасидаги ваколат ва ҳуқуқлари мустаҳкамлаб қўйилмоқда. Лойиҳа товарларни (ишларни, хизматларни) масофадан туриб, ахборот тизимларидан фойдаланган ҳолда реализация қилиш чоғида истеъмолчиларнинг ҳуқуқлари бузилишига йўл қўймаслик ва уларнинг олдини олишга қаратилган нормалар билан ҳам тўлдирилган», — дейилади хабарда.

Депутатларнинг қайд этишича, қонун лойиҳасининг қабул қилиниши истеъмолчилар ҳуқуқлари бузилишининг олдини олиш, сотувчининг истеъмолчи олдидаги масъулияти ва жавобгарлигини оширишга хизмат қилади.

Мажлисда қонун лойиҳаси депутатлар томонидан учинчи ўқишда қабул қилинган ва Сенатга юборилган.

Аввалроқ Чирчиқ шаҳар ҳокимлиги Маънавият бўлинмаси ташаббуси билан ўзбек тилида тўғри ёзилган, доимо зарурий эҳтиёжда бўлган сўз ва номланишларни кичик форматдаги флаерларга чиқариб, энг қулай жойларидаги объектларда жойлаштириш челенжига старт берилганди. Бу ижтимоий тармоқларда кенг баҳс-мунозараларга сабаб бўлгач, ҳокимлик ҳолатга муносабат билдирди. Унда таъкидланишича, Чирчиқ шаҳар ҳокимлиги ўзбек тилида гапириш тарғиб қилинган флаерларда ҳеч бир тилни камситиш мақсад қилинмаган. Кейинроқ ҳокимининг матбуот котиби ижтимоий тармоқлардаги оммавий мунозара пайтида давлат хизматчисининг мақомига хос бўлмаган тарзда ўз фикрини нотўғри шаклда билдиргани учун ишдан олинганди.