Россия ҳукумати 150 минг нафар ўзбекистонликнинг мамлакатга киришига қўйилган тақиқни бекор қилди. Бу ҳақда Россия Мигрантлар федерацияси президенти Вадим Коженовга таяниб, «Подробно» хабар берди.
Таъкидланишича, амнистия мамлакатдан суд қарорига кўра чиқариб юборилган тоифага кирувчи хориж фуқароларига тааллуқли эмас. Агарда депортация Россия Ички ишлар вазирлиги томонидан амалга оширилган бўлса, идоранинг сайти — «Mvd.ru» орқали тақиқ бор ёки йўқлигини текшириш мумкин.
Вадим Коженов фуқароларни ушбу «амнистия» муносабати билан фаоллашган фирибгарларга ишонмаслик бўйича огоҳлантирган. Улар ўзбекистонлик муҳожирларга пул эвазига тақиқни ечиб беришни ваъда қилиб пул ишламоқда, аслида эса тақиқ Россия ҳукумати томонидан олиб ташланган. Тақиқ бор, йўқлигини текшириш жараёни ушбу ҳаволадаги видеода батафсил тушунтирилган.
Эслатиб ўтамиз, 2020 йилнинг сентябрь ойида Шавкат Мирзиёев «Хавфсиз, тартибли ва қонуний меҳнат миграцияси тизимини жорий этиш чора-тадбирлари тўғрисида»ги қарорни имзолаганди. Унда 2021 йил 1 январга қадар Россия ИИВнинг паспорт-виза хизмати ваколатхонасини Ўзбекистонда очиш ҳамда ушбу ваколатхонада вақтинчалик меҳнат фаолиятини амалга оширишга рухсатномани (патентни) тайёрлаш, расмийлаштириш ва бериш хизматларини кўрсатиш кўзда тутилган. Екатеринбург, Новосибирск, Самара, Уфа, Чимкент ва Истанбул шаҳарларида Ташқи меҳнат миграцияси агентлиги ваколатхоналарини очиш режалаштирилганди.
Ўша йилнинг декабрида Ўзбекистон Ташқи меҳнат миграцияси агентлиги ва Россия Паспорт-виза хизмати ҳамда Москва шаҳрининг Кўп тармоқли миграция маркази ўртасида ҳамкорлик тўғрисида келишувлар имзоланди. Ушбу ҳужжат Россияда меҳнат қилиш истагида бўлган Ўзбекистон фуқароларини ташкиллаштирилган ҳолда чиқиш жараёнларини соддалаштириши айтилганди.
Изоҳ (0)