Туркияда коронавирусга қарши вакцина олган ота-оналардан ғайриоддий болалар туғилаётгани тўғрисидаги хабарлар ёлғон ва ҳақиқатга мос келмайди. Бу ҳақда «Stopface.kz» нашри хабар берди.
Қатор Telegram каналларда Туркияда коронавирусга қарши эмланган аёллар мутант болалар туғилаётгани тўғрисида хабарлар тарқалди. Таъкидланишича, чақалоқларнинг думи, юнги ва кўплаб қўл-оёқлари бор. Нашрнинг ёзишича, бу ёлғон бўлиб, ҳақиқатга мос келмайди.
Moderna ва Pfizer/BioNTech вакциналарини олган оналардан мутант болалар туғилаётгани тўғрисида биринчи бўлиб Туркия Фаровонлик партияси раиси Фотиҳ Эрбакан гапирган. Телевидениедаги чиқиши давомида у коронавирусга қарши мРНК-вакциналар инсонлар ДНКсини ўзгартириб юборишини айтган. Шунингдек, у ғайриоддий болаларнинг бир нечта суратларини ҳам намойиш этган.
Қайд этилишича, эълон қилинган суратларнинг бирортаси коронавирус пандемияси ва вакциналарга боғлиқ эмас. Биринчи суратда думи бор чақалоқ тасвирланган — бу график таҳрирлагичнинг иши ҳисобланади. Сурат 2009 йилда сураткаш Саймон Стоун томонидан қайта ишланган.
Усти юнг билан қопланган болакайнинг сурати ҳам вакцинага боғлиқ эмас. Унда гипертрихоз ёки «махлуқ синдроми» дея аталувчи касаллик билан туғилган бола тасвирланган. 2019 йилда Испанияда 16 нафар болада ушбу касаллик аниқланган. Кейинроқ уларнинг барчаси соч тўкилишига қарши восита бўлган дорини ишлатгани маълум бўлган.
Эрбакан томонидан намойиш этилган учинчи суратда 2016 йили Ҳиндистонда туғилган сиам эгизаклари тасвирланган.
«Коронавирусга қарши дори воситалар ДНКни ўзгартириб юборишга қодирлиги борасидаги назариялар конспирологик бўлиб, илмий фактларга зид», — дейилади хабарда.
Изоҳ (0)