Россияда ишламоқчи бўлган ўзбекистонликларга қурилиш соҳасида 10 мингта иш ўрни таклиф этилгани тўғрисида хабар берилганди. Ташқи меҳнат миграцияси агентлигининг маълум қилишича, мазкур фуқароларни ташкилий тарзда ишга жўнатиш лойиҳаси доирасида уларни мамлакат ҳудудида тиббий кўрикдан ўтказишни ташкил этиш учун тиббий асбоб-ускуналар билан Россиянинг 40 нафар тиббиёт ходими Ўзбекистонга етиб келган.
Маълумот учун, 2021 йилнинг сентябрида Россия меҳнат ва ижтимоий ҳимоя вазири ўринбосари А.Пудов бошчилигида қатор давлат ташкилотлари ва йирик иш берувчи корхоналар вакилларидан иборат делегациянинг Ўзбекистонга ташрифи доирасида меҳнат миграцияси масалаларига бағишланган музокаралар ўтказилганди. Унда қурилиш соҳасида меҳнат фаолиятини амалга ошириш учун 10 минг фуқарони яқин вақт давомида соддалаштирилган тартиб асосида Ўзбекистондан Россияга ишга жалб қилишга келишилган эди.
Ушбу лойиҳа доирасида номзодларни ишга жалб қилиш билан боғлиқ, жумладан, тиббий кўрикдан ўтказиш, эмлаш, рус тили, Россия тарихи ва қонунчилиги бўйича имтиҳон топшириш, патент расмийлаштириш ва транспорт харажатлари иш берувчилар томонидан қопланиши кўзда тутилмоқда.
Эндиликда Россия ҳудудида ишлаш ҳуқуқини берувчи патент олишда талаб этиладиган тиббий кўрик Россия Соғлиқни сақлаш вазирлиги томонидан Тошкентда ўрнатилган тиббий асбоб-ускуналар ёрдамида амалга оширилади.
«Мазкур тадбирлар Россияда ишлаш истагида бўлган кўплаб юртдошларимиз учун қўшимча имкониятлар яратиб, фуқароларнинг вақти ва харажатлари қисқаришига хизмат қилади», — дейилади хабарда.
Эслатиб ўтамиз, 2020 йилнинг сентябрь ойида Шавкат Мирзиёев «Хавфсиз, тартибли ва қонуний меҳнат миграцияси тизимини жорий этиш чора-тадбирлари тўғрисида»ги қарорни имзолаганди. Унда 2021 йил 1 январга қадар Россия ИИВнинг паспорт-виза хизмати ваколатхонасини Ўзбекистонда очиш ҳамда ушбу ваколатхонада вақтинчалик меҳнат фаолиятини амалга оширишга рухсатномани (патентни) тайёрлаш, расмийлаштириш ва бериш хизматларини кўрсатиш кўзда тутилган. Екатеринбург, Новосибирск, Самара, Уфа, Чимкент ва Истанбул шаҳарларида Ташқи меҳнат миграцияси агентлиги ваколатхоналарини очиш режалаштирилганди.
Ўша йилнинг декабрида Ўзбекистон Ташқи меҳнат миграцияси агентлиги ва Россия Паспорт-виза хизмати ҳамда Москва шаҳрининг Кўп тармоқли миграция маркази ўртасида ҳамкорлик тўғрисида келишувлар имзоланди. Ушбу ҳужжат Россияда меҳнат қилиш истагида бўлган Ўзбекистон фуқароларини ташкиллаштирилган ҳолда чиқиш жараёнларини соддалаштириши айтилганди.
Изоҳ (0)