Дунё ва ўзбек спортига оид 7 октябрь кунининг энг муҳим хабарлари дайжести билан танишинг.
Ўзбекистон
Оғир атлетика бўйича ўсмирлар ўртасидаги жаҳон чемпионатида илк медал қўлга киритилди
Саудия Арабистонининг Жидда шаҳрида ўтказилаётган оғир атлетика бўйича ўсмирлар ўртасидаги жаҳон чемпионатида Ўзбекистон терма жамоаси ўзининг илк медалини қўлга киритди.
-61 кг вазн тоифасида баҳс олиб борган Ҳусинбой Матрасулов бронза медалига сазовор бўлди. У даст кўтаришда 119 кг натижа кўрсатиб, мазкур йўналиш бўйича учинчи натижани қайд этди. Силтаб кўтаришда унинг натижаси 133 килограммга тенг бўлди. Икки кураш бўйича умумий натижа 252 килограммни ташкил қилди.
Мусобақа 5—12 октябрь кунлари бўлиб ўтади. Унда Ўзбекистон номидан 9 нафар спортчи иштирок этмоқда.
Усмон Тошев ЎФА терма жамоалар бўлими бошлиғи этиб тайинланди
Ўзбекистонлик таниқли мутахассис Усмон Тошев Ўзбекистон футбол ассоциациясининг терма жамоалар бўлимида иш бошлади, деб хабар берди ташкилот матбуот хизмати.
Тошев май ойидан бери «Нурафшон» (собиқ «Бухоро») клубининг бош директори лавозимида ишлаб келаётган эди, у бунга қадар Тожикистон терма жамоасини бошқарганди.
«Нефтчи» уч йиллик танаффусдан кейин Суперлигага қайтди
Фарғонанинг «Нефтчи» клуби Про-Лиганинг 16-турида «Нурафшон»ни мағлуб этди (4:1) ва мусобақа тугашига тўрт тур қолганида Суперлига йўлланмасини қўлга киритди.
16-турдан кейин Фарғона клуби ҳисобида 40 очко мавжуд, жамоа учинчи ўриндаги бухороликлардан 16 очкога илгарилаб кетган. Шу тариқа «Нефтчи» уч йиллик танаффусдан кейин Ўзбекистон олий дивизионига қайтди.
Жаҳон
Саудия Арабистони фонди «Ньюкасл»ни сотиб олди
Саудия Арабистони инвестиция фонди (PIF), PCP Capital Partners, Reuben Brothers ва RB Sports & Media «Ньюкасл»нинг (Англия) янги эгаси бўлди. Бу ҳақда АПЛ расмий сайтида эълон қилинди.
Премьер Лига томонлар ўртасидаги барча ҳуқуқий тафовутлар ҳал қилинганини ва Саудия Арабистони Қироллиги клуб ишларини назорат қилмаслигини кафолатлади.
Маълумотларга кўра, мазкур фонд дунёдаги энг катта хусусий фонд ҳисобланади, унинг мулки АПЛ жамоаларининг барчасиникидан 75 фоизга каттароқ. Жамғарманинг активлари 430 миллиард долларга баҳоланмоқда.
Бунгача «Ньюкасл»га 14 йил давомида Майк Эшли эгалик қилиб келаётганди. У клубни 300 миллион фунтга сотган.
Пол Погба «Манчестер Юнайтед» билан шартномани узайтирмоқчи
Ярим ҳимоячи Пол Погба «Манчестер Юнайтед» билан янги шартнома имзолаши мумкин.
GFFN’га кўра, франциялик футболчи атрофидагиларга «қизиллар» билан шартномани узайтирмоқчи эканлигини маълум қилган.
Шунингдек, 28 ёшли футболчи янги шартнома орқали Англия Премьер Лигасининг энг кўп маош олувчи футболчиларидан бирига айланиши мумкинлиги қўшимча қилинган.
Қайд этилишича, томонлар янги битим борасидаги музокараларни бошлаб юборган.
Қатарнинг 2022 йилги Жаҳон Чемпионатини ўтказиш учун дастлабки харажатлари 200 миллиард долларни ташкил қилди
Қатарнинг Россиядаги элчиси Шайх Аҳмад бин Носир бин Жасим Ат-Тани 2022 йилги Жаҳон Чемпионатига тайёргарлик бўйича мамлакатнинг дастлабки харажатлари 200 миллиард долларни ташкил қилганини маълум қилди.
«Айни пайтда давлатимиз турнирни ташкил этишга 200 миллиард долларга яқин маблағ сарфлаган. Бу миқдор ўз ичига стадионлар, метро, аэропортлар, янги шаҳар ва порт қурилишини олади», — дейди элчи.
Маълумот учун, Қатар мезбонлик қиладиган мундиал 2022 йилнинг ноябрь ва декабрь ойларида бўлиб ўтади.
«ПСЖ» Мбаппега янги шартнома таклиф қилади
«ПСЖ» мавсум охирида эркин агентга айланадиган Килиан Мбаппени ўз сафида ушлаб қолмоқчи ва унга янги шартнома таклиф қилади.
Журналист Николо Скиранинг ёзишича, Париж клуби 22 ёшли футболчига 5 йиллик шартнома таклиф қилади, унинг йиллик маоши эса 36 миллион еврони ташкил қилади. Қайд этиш керак, Неймарнинг ҳам «ПСЖ»даги маоши 36 миллион еврони ташкил қилади.
Аввалроқ «Реал»нинг Мбаппега 6 йиллик шартнома таклиф қилгани, футболчининг маоши эса йилига 40 миллион еврони ташкил қилиши ҳақида хабар берилганди.
Енгилмас Италиянинг мағлубиятсиз сериясига нуқта қўйилди
Италия терма жамоаси Миллатлар Лигаси ярим финали доирасида ўз майдонида Испанияга мағлуб бўлди (1:2).
Бу итальянлар учун 1999 йилдан бери ўз майдонида учралган илк мағлубият бўлди. Ўшанда жамоа Евро—2000 саралаши доирасида Данияга имкониятни бой бериб қўйганди — 2:3.
Эътиборлиси, ўшанда ҳозирги Испания терма жамоасининг олти нафар ўйинчиси ҳали туғилмаган эди. Булар — Педро Порро, Ферран Торрес, Эрик Гарсия, Брайан Хил, Ереми Пино ва Гави.
Шунингдек, мазкур учрашувда Италия терма жамоасининг 37 та ўйиндан иборат мағлубиятсиз сериясига нуқта қўйилди. Бу жаҳон рекорди ҳисобланади.
Роберто Манчини жамоасининг мағлубиятсиз серияси 2018 йилдан бери давом этаётганди.
Бундан олдинги жаҳон рекорди Бразилия ва Испанияга тегишли эди. Пентакампеонлар 1993—1996 йилларда 35 та учрашувда мағлубиятга учрамаган бўлса, 2007 йилдан 2009 йилгача Испания ҳам худди шундай натижа қайд этган.
Гави Испания терма жамоаси тарихидаги энг ёш футболчига айланди
«Барселона» ярим ҳимоячиси Гави Миллатлар Лигаси ярим финалидан ўрин олган Италияга қарши ўйинда майдонга тушди. Ўйин ўтказилган куни футболчи 17 ёш-у 62 кунлик эди. Шу тариқа Гави Испания терма жамоаси тарихидаги энг ёш футболчига айланди.
Бундан олдинги рекорд 1936 йилда дебют қилган Анхель Субета (17 ёш-у 284 кун) тегишли эди. Ушбу кўрсаткич борасида учинчи ўринда каталон клубининг яна бир ўйинчиси Ансу Фати (17 ёш-у 308 кун) бормоқда.
Изоҳ (0)