Netflix стриминг сервиси бутун дунёда машҳурликка эришган «Калмар ўйини» сериалида кўрсатилган ташриф қоғозидаги телефон рақамни таҳрирлайди. Бунга ушбу телефон рақамнинг ҳақиқий эгаси кунига минглаб қўнғироқ ва SMS олаётгани сабаб бўлган, деб ёзади Esquire.
Жанубий Корея шоусининг қаҳрамонлари оғир молиявий қийинчиликка учраган бўлиб, катта пул мукофоти учун омон қолиш ўйинида иштирокини ташриф қоғозидаги рақам орқали тасдиқлаши керак. Ушбу рақамнинг ҳақиқий эгаси сўзларига кўра, ҳозирда унга кеча-ю кундуз номаълум шахслар қўнғироқ қилиб, ўйинга қўшилишга тайёрлигини билдирмоқда, бунинг оқибатида телефон қуввати ярим кунга ҳам етмаяпти.
Reuters’нинг маълум қилишича, рақами «тарқалиб кетган» аёл тадбиркор Ким Гил Ён бўлиб, шунингдек, у матнли хабарлар ҳам ёғилиб келаётганидан шикоят қилган. Шу билан бирга, аёл мижозлари билан алоқалари сабаб рақамини ўзгартира олмайди.
Юзага келган тушунмовчилик учун аёлга дастлаб 480 доллар миқдорида компенсация таклиф қилинган, кейинроқ ушбу сумма 4,2 минг долларга чиққан, аммо у рад этган. Бундан ташқари, Жанубий Корея президентлигига номзод Хео Кёнг Янг тадбиркордан унинг телефон рақамини 84 минг долларга сотиб олиш таклифини берган, бироқ у ҳам рад жавобини олган.
Номаълум шахслар қўнғироғидан сериалда кўрсатилган рақамдан биттага фарқ қилувчи телефон рақами эгалари ҳам жабр кўрмоқда. Netflix ҳозирда томошабинлардан «Калмар ўйини»даги ташриф қоғозида кўрсатилган рақамларга қўнғироқ қилмасликни сўраяпти. Компаниядагиларнинг айтишича, улар атайлаб шоуда сўнгги саккизта рақамни кўрсатган, бироқ уни териш вақтида префикс автоматик қўшилиб қолишини билмаган.
Аввалроқ Жефф Безос Netflix’ни «Калмар ўйини» учун мақтагани тўғрисида хабар берилганди.
Изоҳ (0)