Amazon асосчиси Жефф Безос Netflix стриминг сервиси «Кальмар ўйини» сериалини тақдим этгани учун ҳурматини билдирди, деб хабар беради «Фильм.ru».
«Рид Хэстингс [Netflix ҳамасосчиси — таҳр.] ва Тед Сарандос [контент раҳбари] деярли ҳар доим керагидек иш тутади. Уларнинг интернализация борасидаги стратегияси (салбий ташқи эффектларни уларни ичкига айлантириш орқали бартараф этиш ёки қисқартириш) осон эмас, аммо улар буни амалга оширяпти. Ҳайратланарли ва илҳомлантирадиган даражада (ва мен сериални кўришга ошиқяпман)», — деб ёзади Безос Twitter’даги саҳифасида.
Айрим фойдаланувчиларнинг ҳисоблашича, тез орада Безос ва Netflix ҳамкорликда лойиҳа яратишларини эълон қилиши мумкин, аммо у ушбу миш-мишларга барҳам берган: «Йўқ, шунчаки завқланиш».
Жанубий Кореянинг «Кальмар ўйини» сериали стриминг платформада 17 сентябрь куни старт олган ва ўшандан буён дунёнинг 90 давлатида энг машҳур лойиҳалар рўйхатига етакчилик қилмоқда. Сарандоснинг таъкидлашича, тез орада «Ўйин» «Брижертонлар» ва «Ведьмак»ни ортда қолдириб, Netflix тарихидаги энг машҳур хитга айланади.
Сериал сюжети омон қолиш ҳақида бўлиб, унда молиявий муаммоларга дуч келган 456 киши иштирок этади. Ўйиннинг ютуқ мукофоти 38,5 миллион долларни ташкил этади, аммо финалга барча ҳам етиб бора олмайди.
Аввалроқ Netflix Бритни Спирс ҳақидаги ҳужжатли фильмнинг биринчи трейлерини тақдим этгани тўғрисида хабар берилганди.
Изоҳ (0)