«Тахтлар ўйини»нинг Таргариенлар ўртасидаги уруши ҳақида сўзловчи «Аждар уйи» фильмининг биринчи тизери чиқди

HBO Max стриминг сервиси «Тахтлар ўйини»нинг приквели — «Аждар уйи»нинг биринчи тизерини тақдим этди, деб хабар беради Esquire.

Сериал Жорж Р.Р.Мартиннинг «Олов ва қон» асарига асосланган. Шоудаги воқеалар «Тахтлар ўйини»да тасвирланган ҳодисалардан 200 йил олдин содир бўлади. Сюжет марказидан «Аждарлар рақси» дея машҳурликка эришган Таргариенлар ўртасидаги фуқаролик уруши ўрин олган.

«Аждар уйи»да Пэдди Консидайн, Эмма Д’Арси, Оливия Кук, Мэтт Смит ва бошқалар роль ижро этган. Картинага «Тахтлар ўйини»нинг бир нечта эпизодини тасвирга олган Мигель Сапочник ижрочи продюсери сифатида иштирок этади.

«Орзулар эмас, аждарлар бизни қирол қилди», — дейилади тизерда. Сериал премьераси 2022 йилга режалаштирилган.

Маълумот учун, «Тахтлар ўйини» сериали Жорж Мартиннинг «Муз ва олов қўшиғи» романи асосида суратга олинган. Унинг биринчи фасли премьераси 2011 йилнинг апрелида бўлиб ўтган, охирги — саккизинчи фасли эса 2019 йилнинг апрелида чиқди. Сериал Америка телевидениеси тарихидаги энг қиммат лойиҳалардан бири бўлди.

Аввалроқ «Тахтлар ўйини» юлдузи Эмилия Кларк Marvel кинооламининг янги суперқаҳрамонига айланиши маълум бўлганди.