Дени Вилнёвнинг «Дюна» номли фантастик блокбастери касса йиғимлари бўйича 100 миллион долларлик маррадан ўтиб кетди (100,3 миллион доллар). Бунга 22 октябрь куни АҚШ прокатига чиқишидан олдин эришилган, деб хабар беради «Film.ru».
Мазкур фильм сентябрь ўрталарида Россия, Франция, Жанубий Корея ва бошқа давлатлардаги 32 та майдончада тақдим этилган. Россия прокатида картина 18,2 миллион доллардан ортиқ маблағ тўплаган бўлиб, ҳозирча у мамлакатда йилнинг энг яхши касса йиғими ҳисобланади.
«Дюна»нинг ишлаб чиқариш бюджети 165 миллион долларни ташкил этган — лента ўзини оқлаши учун камида икки баробар кўпроқ маблағ тўплаши керак (330 миллион доллар). АҚШдан ташқари фильм параллел равишда HBO Max стрим-сервисида ҳам намойиш этилади, йирик майдончалар орасида фақат Хитой қолмоқда (22 октябрь).
Венециядаги жаҳон премьерасидан кейин Вилнёв агарда Warner Bros. студияси лойиҳани давом эттиришга рухсат берса, 2022 йилнинг кузидан «Дюна»нинг сиквелини суратга олишни бошлашга ваъда берганди. Ҳозирда раҳбарият томонидан расмий баёнот берилмаган.
Аввалроқ Брэд Питт ва Жорж Клуни «Ўргимчак одам» режиссёрининг янги триллерида бирга суратга тушиши, Скарлетт Йоханссон ва Disney ўртасидаги келишмовчиликка барҳам берилгани тўғрисида хабар берилганди.
Изоҳ (0)