Ўзбекистон ва Туркманистон электр энергия етказиб бериш бўйича қўшимча келишувни имзолади

Ўзбекистон ва Туркманистон электр энергиясини яна бир йил давомида етказиб бериш бўйича ўзаро битим имзолади. Бу ҳақда инвестициялар ва ташқи савдо вазирининг биринчи ўринбосари Лазиз Қудратовга таяниб, «Gazeta.uz» хабар берди.

«[Битим] кейинги йилга ҳам узайтирилди… Нархлар аниқ олдинги даражада сақланган», — дейди Қудратов.

Энергетика вазирлиги матбуот хизматининг маълум қилишича, Туркманистондан Ўзбекистонга электр энергиясини етказиб бериш «Ўзбекистон миллий электр тармоқлари» АЖ ва Туркманистоннинг «Туркманэнерго» давлат электр энергетика коорпорацияси билан 2019—2020 йилларда электр энергиясини импорт қилиш юзасидан имзолаган келишувига асосан амалга оширилиб келган.

«2022 йилнинг январидан декабрига қадар электр энергиясини етказиб бериш ‘Туркманэнерго’ ва ‘Ўзбекистон миллий электр тармоқлари’ ўртасидаги навбатдаги қўшимча битим асосида амалга оширилади», — дейилади хабарда.

Шу билан бирга, Энергетика вазирлиги етказиб бериладиган электр энергиясининг ҳажми ва нархини маълум қилишдан бош тортган. 2019 йил декабрь бошида қўшни республикадан икки кун ичида 14,9 миллион ва 15,4 миллион кВт/соат электр энергия импорти амалга оширилгани маълум қилинганди.

2020 йилнинг февралида Туркманистондаги юқори волтли электр узатиш тармоғида юзага келган авария оқибатида Ўзбекистонга электр энергиясини етказиб бериш 780 МВт дан 60 МВт га тушиб кетган эди.

Ўзбекистон сўнгги уч йил ичида аҳолининг истеъмоли ва саноат учун Марказий Осиёдаги қўшни мамлакатлардан электр энергия импортини қайта тиклади. 2018 йилда Қирғизистон ва Тожикистондан импорт қайта йўлга қўйилди, 2019 йилнинг июлида — Қозоғистондан Марказий Осиё энергетика тизми ишларидаги иштироки учун.

2020 йилда Ўзбекистон 115,7 миллион долларлик электр энергия импорт қилди, бу 2019 йилга нисбатан 2,1 бараварга кўп демак. 2021 йилнинг дастлабки 8 ойи ичида ушбу кўрсаткич 110 миллион долларга етган. Шу билан бирга, мамлакат 2020 йилда 135 миллион долларлик электр энергия экспорт қилган, 2021 йилнинг январь—августи бўйича эса 82,5 миллион долларлик экспортни амалга оширган.