Ўзбекистон Фанлар академияси ижтимоий тармоқларда тарқалган Марғилон ва Самарқанд узра номаълум жисм учиб ўтгани тасвирланган видео бўйича маълумот берди.
Ижтимоий тармоқларда 5 октябрь куни соат 02:20 да Самарқанд осмонидан номаълум жисм учиб ўтгани тасвирланган видео тарқалди. Таъкидланишича, ушбу жисм Ўзбекистоннинг деярли барча нуқтасидан кўринган.
Фанлар академияси Астрономия институти кичик илмий ходими Камолиддин Эргашевнинг маълум қилишича, Марғилон ва Самарқандда олинган видеоматериаллардаги жисмларнинг учиш вақти бир бўлса-да, уларнинг ҳар иккиси бир объектга тегишлилиги ҳақида қатъий хулоса чиқариб бўлмайди. Сабаби Марғилонда олинган видеодаги жисм қўшалоқ ва ортидан ўзига хос ингичка ва хира из қолдирган. Самарқандда олинган видео сифати эса юқоридаги фактларни тасдиқлаш имконини бермайди.
«Агар бу объектларни ортидаги хира издан комета ва унинг думи деб тавсифлашга ҳаракат қилинса, унинг видеоматериалдаги нисбий тезлигига кўра бу мумкин эмас. Чунки комета атмосферадан ташқарида ва анча узоқда бўлгани сабабли бундай катта кўринма бурчак тезликда ҳаракатлана олмас эди. Агар Ерга жуда яқин комета деб тасаввур қилинса, бундай кичик ўлчам билан у ортидаги думини ўз гравитацион майдонида тутиб тура олмас эди», — дейди мутахассис.
«Умуман олганда, видеоматериалларнинг сифати ва улардаги далиллар бу объектларнинг табиати ҳақида хулоса беришга етарли эмас», — дейди у.
Эслатиб ўтамиз, 2019 йил 26 июль оқшомида ўзбекистонлик ва қозоғистонлик интернет фойдаланувчилари ижтимоий тармоқларга тунги осмонда кузатилган чақнаш акс этган видеороликларни юклаганди. Ўзбекистонда самодаги бундай ҳодисани Самарқанд, Бухоро, Тошкент шаҳарларида кузатиш мумкин бўлган. Ўзбекистон осмонида кўринган ушбу номаълум жисм «Топол» қитъалараро баллистик ракетаси бўлиши мумкинлиги тахмин қилинган.
Изоҳ (0)