Ижтимоий тармоқларда Бобур Ғаниев номи билан танилган блогер ЙПХ ходимини ҳақорат қилгани учун қўлга олиниб, 15 сутка маъмурий қамоқ жазоси тайинланганди. Тошкент шаҳар судлари матбуот хизматининг маълум қилишича, блогернинг адвокати томонидан келтирилган апелляция шикояти қаноатлантирилмади.
Эслатиб ўтамиз, интернетда ЙПХ ходимларини танқид қилган видеолари билан танилган блогер Бобур Ғаниев 30 сентябрь куни ушланганди. Шу куни соат 23:30 ларда Учтепа тумани «Фарҳод» бозори рўпарасида ўтказилаётган «Хавфсиз пойтахт» профилактик тадбири давомида Тошкент шаҳар ИИББ ЙҲХБ ЙПХ инспекторлари томонидан блогер кетаётган Epica тўхтатилган.
Машина ҳайдовчиси Аброр Козубаевнинг ҳужжатлари текширилган. Epica’да йўловчи сифатида ўтирган Бобур Ғаниев ЙПХ инспекторларини ҳақорат қилиб, жанжал кўтарган. ИИО ходимларининг қонуний талабларига бўйсунмасдан жамоат тартибини бузган. Шундан сўнг транспорт воситасининг ҳайдовчиси, йўловчилари — Бобур Ғаниев ва Обид Салимов Учтепа тумани ИИО ФМБга олиб борилган.
Ҳолат юзасидан ҳужжатларни расмийлаштириш ва текширув ўтказиш жараёнида Бобур Ғаниевнинг шахсий уяли телефон аппаратида порнографик мазмундаги, қонунда тақиқланган видеоматериаллар ва фотосуратлар борлиги аниқланган. Блогернинг ўзи ҳам қонунбузарлик содир этганини тан олган.
Юз берган ҳолат бўйича тўпланган ҳужжатлар Жиноят ишлари бўйича Учтепа туман судига тақдим этилган ва Бобур Ғаниевга Маъмурий жавобгарлик тўғрисидаги кодекснинг 41-моддасида кўрсатилган ҳуқуқбузарликни содир этгани учун (ҳақорат қилиш) БҲМнинг 20 баробари (5,4 миллион сўм), 194-модда (ички ишлар органлари ходимининг қонуний талабларини бажармаслик) бўйича БҲМнинг 1 баравари (270 минг сўм), 195-модда (ички ишлар органлари ходимларининг ўз хизмат бурчларини бажаришларига қаршилик кўрсатиш) бўйича эса 15 сутка маъмурий қамоқ жазоси белгиланган. Бундан ташқари, Epica ҳайдовчиси ва яна бир йўловчига ҳам тегишлича жазо тайинланган.
Шундан сўнг, блогернинг адвокати Ф.Толибов томонидан суд қарорига нисбатан апелляция шикояти келтирилган. Аммо 6 октябрь куни Тошкент шаҳар суди жиноят ишлари бўйича судлов ҳайъати апелляция инстанцияси Бобур Ғаниевга нисбатан жиноят ишлари бўйича Учтепа туман судининг қарорини ўзгаришсиз қолдирган.
Изоҳ (0)