Ўзбекистонда 28 сентябрдан 12 ёшдан катта болаларни ҳам коронавирусга қарши Pfizer вакцинаси билан ихтиёрий равишда эмлашга рухсат берилганди. Соғлиқни сақлаш вазирлиги шу кундан буён қанча бола ушбу вакцина билан эмланганини маълум қилди.
Қайд этилишича, 5 октябрь ҳолатига кўра, республика бўйича 87 710 нафар 12 ёшдан 18 ёшгача бўлган болалар Pfizer вакцинаси билан ихтиёрий равишда эмланди.
Ҳозирда мамлакатда оммавий вакцинация тадбирлари 3 138 та эмлаш пунктида ва 862 та ҳаракатдаги бригадалар томонидан амалга оширилмоқда. Ҳудудлардаги исталган эмлаш пунктида 12 ёшдан катта болалар ота-оналари ва васийларининг розилиги асосида коронавирусга қарши эмланиши мумкин.
Маълумот учун, ота-оналар ва васийларининг розилиги асосида 12 ёшдан катта болаларни Pfizer вакцинаси билан эмлаш бош давлат санитария врачи ва миллий техник иммунологик эксперт комиссиясининг қарорига асосан йўлга қўйилган.
Коронавирусга қарши Pfizer вакцинасининг 12-15 ёшдаги болаларда ўтказилган клиник синовларининг натижалари мазкур вакцинанинг юқори даражада самарадорлиги ва хавфсизлигини кўрсатган бўлиб, Жаҳон соғлиқни сақлаш ташкилоти томонидан 12 ёшдан юқори болаларни ва ўсмирларни Pfizer вакцинаси билан эмлаш тавсия этилган.
Ўзбекистонга 1,2 миллион доза Pfizer/BioNTech вакцинаси олиб келинган бўлиб, 5 октябрь ҳолатига кўра, ушбу вакцинанинг 465 010 дозаси эмлаш жараёнларида фойдаланилди.
Изоҳ (0)