Наманганда прокуратура ходими аёл кишига куч ишлатгани айтилмоқда

Бош прокуратура ижтимоий тармоқларда тарқалган Наманганда прокуратура ходими аёл кишига куч ишлатгани айтилаётган видеога муносабат билдирди.

Ижтимоий тармоқларда бир эркакнинг аёл кишига куч ишлатиб, унинг ерга йиқилишига сабабчи бўлгани тасвирланган видео тарқалди. Telegram’даги «Мухбир Далиев» канали муаллифининг ёзишича, видеодаги эркак Наманган прокуратураси ходими ҳисобланади.

Бош прокуратура матбуот хизмати раҳбари Ҳаёт Шамсутдинов видеохабарда кўрсатилган ҳолат Бош прокуратура томонидан ўрганиб чиқилаётгани, натижаси бўйича маълумот берилишини маълум қилди.

Аввалроқ Андижонда уйида ободонлаштириш ходимларини мажбуран ишлатган прокурор ишдан олингани тўғрисида хабар берилганди.